ఎవరికీ సంతృప్తి కలిగించని అనుమతి

Posted: 09/05/2013 04:48 PM IST

సేవ్ ఆంధ్ర ప్రదేశ్ పేరుతో ఏపి ఎన్జీవోలు 7 న హైద్రాబాద్ ఎల్ బి స్టేడియంలో ఏర్పాటు చేస్తున్న సభకు పోలీసుల అనుమతి లభించినా ఎవరికీ పూర్తిగా సంతృప్తికరంగా లేకుండా పోయింది.
మాకు అనుమతినివ్వలేదు కానీ సీమాంధ్రులకిచ్చారు చూసారా అని తెలంగాణా ఉద్యోగ నాయకులు నిష్టూరాలాడుతున్నారు. 

కేవలం ఉద్యోగులే రావాలి, ఐడి కార్డులు చూపించాలి, వేరెవరికీ అనుమతుల్లేవంటూ 19 ఆంక్షలు పెట్టి, పోలీసు శాఖ అటు ఎపి ఎన్జీవోలకు కూడా సంతృప్తిని కలిగించలేకపోయింది.  సీమాంధ్రుల పట్ల పక్షపాతం చూపిస్తున్నదన్న అపవాదునెలాగూ మోస్తోంది. 

స్టేడియం ను మీకు ముందుగా ఇవ్వమని చెప్పిన స్టేడియం యాజమాన్యం చెప్పటంతో అప్పటికప్పుడు ఎలా సిద్ధం చేసుకుంటాం అని కూడా ఎపి ఎన్జీవోలు బాదపడుతున్నారు.  మధ్యాహ్నం రెండు గంటల నుంచి సాయంత్రం 5 గంటల వరకే అనుమతి ఉంది.  ఈ లోపులేనే చెప్పదలచుకున్నదంతా చెప్పాలి, చెయ్యదలచుకున్నదంతా చెయ్యాలి.  స్టేడియం కెపాసిటీని మించి లోపలికి అనుమతించరు.  రెచ్చగొట్టే మాటలు మాట్లాడవద్దని ఆంక్షలు.

ఏపిఎన్జీవోల దరఖాస్తుని పూర్తిగా పరిశీలించిన తర్వాతనే అనుమతినిచ్చామని, సభను పెట్టుకోవటానికి ఎవరైనా దరఖాస్తు పెట్టుకోవచ్చని, అయితే పూర్తిగా పరిశీలించిన తర్వాతనే అనుమతులివ్వటం జరుగుతుందని చెప్పిన పోలీస్ కమిషనర్ అనురాగ్ శర్మ, అనుమతులు లేకుండా ర్యాలీలు చెయ్యటానికి వీల్లేదని గట్టిగా చెప్పారు.  కాదు మేము ఎలాగైనా ర్యాలీ నిర్వహిస్తామని తెలంగాణా రాజకీయ ఐకాస ఛైర్మన్ కోదండరామ్ అన్నారు. 

మొత్తానికి ఈ సభకు అనుమతి లభించినా అందరికీ ఏదో అసంతృప్తిని కలిగిస్తోంది. 

-శ్రీజ