ఇప్పుడు వెనక్కి తగ్గేది లేదు : సోనియా

Posted: 08/22/2013 10:07 AM IST

కాంగ్రెస్ హైకమాండ్ పిలుపు మేరకు ఢిల్లీ వెల్లిన ముఖ్యమంత్రి కిరణ్ కుమార్ రెడ్డి కాంగ్రెస్ అధినేత్రి సోనియా గాంధీ, ఏఐసీసీ ఉపాధ్యక్షుడు రాహుల్ గాంధీ తో టెన్ జనపథ్ లో దాదాపు 50 నిమిషాలకు పైగా భేటీ అయ్యాడు. ఈ భేటీలో ముఖ్యంగా సమైక్యవాదాన్నే వినిపించే ప్రయత్నం చేసినట్లు సమాచారం. పార్టీ హైకమాండ్‌ హస్తినకు పిలిచినప్పుడల్లా వెళ్లిన ప్రతి సందర్భం లోనూ సమైక్యవాదం వినిపించడంలో ఆయన వెనకాడటం లేదు. విభజనతో తలెత్తే సమస్యలను వివరిస్తూ రూపొందించిన రెండు నివేదికలను నిన్నటి భేటీలో సోనియా, రాహుల్‌లకు సమర్పించినట్టు తెలుస్తుంది. విభజన అంశం పై కాంగ్రెస్ పార్టీ ముందుకు వెళితే... సీమాంధ్రలో కాంగ్రెస్‌కు పుట్టగతులుండవు, కాంగ్రెస్ పార్టీని సీమాంధ్రలు మరచిపోయే పరిస్థితి వస్తుందని గట్టిగా వాదించినట్లు సమాచారం. కిరణ్ చెప్పివన్ని ఓపిగ్గా విన్న సోనియాగాంధీ.... మాత్రం తెలంగాణ అంశం పై వెనక్కి తగ్గలేదని తెలుస్తుంది.

తెలంగాణ ఏర్పాటు నిర్ణయంపై పునరాలోచన చేసే సమస్యే లేదని , రాష్ట్ర విభజన పై నిర్ణయం జరిగిపోయిందని, ఆ విషయంలో ఏ మాత్రం వెనక్కి తగ్గేది లేదని, విభజన ప్రక్రియ ముందుకు సాగాల్సిందేనని, విభజన ప్రక్రియకు అందరు సహకరించాల్సిందేనని అలా లేని పక్షంలో రాష్ట్రపతి పాలనా విధించడానికైనా సిద్దమే అని కిరణ్ కి గట్టిగా చెప్పినట్లు రాజకీయ వర్గాల సమాచారం. సీమాంధ్ర ప్రజల సమస్యలకు పరిష్కారాలను కనుగొనే ప్రయత్నాలు చేస్తున్నామని, అందరికీ నచ్చజెప్పే ప్రయత్నాలు కొనసాగించండని, విభజన నిర్ణయాన్ని అమలు  చేయడంలో ముఖ్యమంత్రిగా క్రియాశీల పాత్ర పోషించి ప్రత్యేక శ్రద్ద తీసుకోవాలని సోనియాకిరణ్‌కు సూచించారని తెలిసింది. విభజననుగానీ, వర్కింగ్ కమిటీ తీర్మానాన్నిగానీ వ్యతిరేకించడం లేదంటూనే... ముఖ్యమంత్రి మరింత బలంగా సమైక్యవాదాన్ని వినిపించినా సోనియా పట్టించుకోకపోవడంతో కిరణ్ కాస్త నిరాశకు లోనైనట్లు తెలుస్తుంది.