బాబాయ్‌ కి అవకాశం ఇచ్చిన జగన్ ?

Posted: 08/06/2013 09:18 PM IST

వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి ఎట్టకేలకు తన బాబాయ్ వైయస్ వివేకానందరెడ్డిని కరుణించినట్లు కనిపిస్తున్నారు. కాంగ్రెసు పార్టీకి రాజీనామా చేసి తన వైపు వచ్చినా వైయస్ జగన్ బాబాయ్‌ని పెద్దగా పట్టించుకోలేదు. ఆయనకు ఏ విధమైన బాధ్యతలు కూడా అప్పగించలేదు. అయితే, వైయస్ వివేకానంద రెడ్డి సహనంతో వ్యవహరిస్తూ వైయస్ జగన్‌కు మద్దతుగా మాట్లాడుతూ వస్తున్నారు. వైయస్ వివేకానంద రెడ్డికి కీలక బాధ్యతలు అప్పగించాలని వైయస్ జగన్ నిర్ణయించారు. అనంతపురం జిల్లాలో అనంతపురం లోక్‌సభ స్థానం పరిధిలోని తాడిపత్రి, కళ్యాణదుర్గంలతో పాటు హిందూపురం లోక్‌సభ స్థానం పరిధిలోని మడకశిర, కదిరి, పెనుకొండ, హిందూపురం శాసనసభ స్థానాల పరిశీలకుడిగా వైయస్ వివేకానంద రెడ్డిని నియమిస్తూ ఉత్తర్వులు జారీ చేశారు. ఆరు శాసనసభా నియోజకవర్గాల్లోనూ పార్టీని బలోపేతం చేసే బాధ్యతను వైయస్ వివేకానంద రెడ్డికి జగన్ అప్పగించారు. అయితే, కడప జిల్లా నుంచి వైయస్ వివేకానంద రెడ్డి దూరంగా ఉండాల్సిందేనా అనే ప్రశ్న ఉత్పన్నమవుతోంది. అనంతపురం జిల్లాలోని ఆ బాధ్యతలను బాబాయ్‌కి ఏ ఉద్దేశంతో అప్పగించారనేది తెలియడం లేదు.