నలభై సంవత్సరాల హిందీ టైటానిక్

Posted: 08/02/2013 12:10 PM IST

1973 లో 35, 40 లక్షల మధ్యలో ఖర్చుపెట్టి తీసిన సినిమా లవ్ ఇన్ బోంబే మన దేశపు టైటానిక్ 2013లో విడుదల కాబోతోంది.  ఇది అప్పుడే విడుదలైవుంటే టైటానిక్ నే దీనితో పోల్చి వుండేవారు. 

అప్పటి హిందీ సినిమాల్లో హీరో జాయ్ ముఖర్జీ తన దగ్గరున్నదంతా ఊడ్చిపెట్టి లవ్ ఇన్ బోంబే అనే సినిమాను నిర్మించారు.  అందులో వహీదా రెహమాన్ హీరోయిన్.  ఒక ఓడ మీద చిగురించిన ప్రేమ కథ లో మలుపు ఏమిటంటే ఆ ఓడ తుఫాన్ లో చిక్కుకుంటుంది.  సుఖాంతం కోరుకునే భారతీయుల మనోభావాలు దెబ్బతినకుండా మన హీరో ఆ హీరోయిన్ తో పాటు ప్రయాణీకులను కూడా రక్షించే ప్రయత్నం చేస్తాడు, హీరోయిన్ ప్రేమను చూరగొంటాడు. 

ఈ సినిమా అప్పట్లో ఆధునిక సాంకేతిక విజ్ఞానాన్ని ఉపయోగించి నిర్మించి చెయి కాల్చుకున్న జాయ్ ముఖర్జీ దాన్ని విడుదల చేసే పనిని పక్కన పెట్టినా ఆ ఫిల్మ్ ని మాత్రం చెడిపోకుండా జాగ్రత్త చేసారు. 

జీవితంలో తీరని కోరికతో చనిపోయిన తండ్రి కోసం ఆయన తనయులు ఈ సినిమాను ఇప్పుడు విడుదల చేయటానికి ఏర్పట్లు చేసారు.  తండ్రి ఒక పని చెయ్యలేకపోవటానికి కారణం ఆయనలో సామర్థ్యం లేకపోవటం ఒక్కటే కాకపోవచ్చు.  పిల్లలను పెంచటం, విద్యాబుద్ధులు అందించి వాళ్ళని జీవితంలో తీర్చిదిద్దటం కోసం కూడా కొన్ని కోరికలను అణగదొక్కుకునే తల్లిదండ్రులు ఈ గడ్డ మీద ఎందరో ఉన్నారు.  కానీ దాన్ని వాళ్ళ పిల్లలు సామాన్యంగా గుర్తించరు. 

అయితే జాయ్ ముఖర్జీ విషయంలో అతని కుమారులు ఇద్దరూ వారికి ఆ స్తోమతు లేకపోయినా విడుదల చేసి తండ్రి ఋణాన్ని తీర్చుకోవటానికి చేసిన ప్రయత్నం శ్లాఘనీయమని హిందీ చిత్ర పరిశ్రమంతా అంటోంది.

-శ్రీజ