రాష్ట్రవిభజన మీద స్పష్టమైన అస్పష్టత

Posted: 07/27/2013 10:41 AM IST

రాష్ట్ర విభజన మీద ఏమాత్రం స్పష్టత రాలేదన్న విషయం నిన్న కోర్ కమిటీ సమావేశం తర్వాత దిగ్విజయ్ సింగ్ మాటల్లో అర్థమౌతోంది. 

రాష్ట్ర ప్రతినిధుల ఉద్దేశ్యాలను కోర్ కమిటీ పరిశీలించటం జరిగింది, ఇక ప్రభుత్వం ఒక నిర్ణయం తీసుకోవటమే మిగిలింది అని దిగ్విజయ్ చేసిన ప్రకటన వలన ఏ విషయమూ స్పష్టంగా లేకపోగా ఎవరి నమ్మకాలను వారు నమ్ముతూ రాజకీయ నాయకులు తమ తమ ప్రకటనలను చేస్తున్నారే తప్ప ఎవరికీ ఏ మాత్రం స్పష్టతా ఈ విషయంలో లేదన్న విషయం మాత్రం స్పష్టంగా తెలుస్తోంది. 

రాష్ట్రం నుంచి మరోసారి ముగ్గురు నాయకులు వెళ్ళటమైతే జరిగింది కానీ వాళ్ళు కోర్ కమిటీ లో కాకుండా విడిగా కాంగ్రెస్ నాయకులతో మాట్లాడటం కోసం మాత్రమే పిలిపించారు.  ముఖ్యమంత్రి కిరణ్ కుమార్ రెడ్డి దిగ్విజయ్ సింగ్ తో భేటీ అయినప్పుడు రాష్ట్రాన్ని ముక్కలు చెయ్యకపోతేనే కాంగ్రెస్ మనుగడ ఉంటుందన్న విషయాన్ని స్పష్టం చేసారు.  ఆ తర్వాత సోనియా గాంధీతో కూడా రాష్ట్రంలోని రాజకీయ అంశాలను, రాష్ట్ర విభజన జరిగితే వచ్చే కష్టనష్టాలను ఆయన వివరించారు.  నాయకుల మూకుమ్మడి రాజీనామాల విషయంలో కూడా చర్చించుకున్నట్లుగా సమాచారం.

పిసిసి అధ్యక్షుడు బొత్సా సత్యనారాయణ కూడా రాష్ట్రవిభజన వలన పార్టీకి నష్టమనే అభిప్రాయాన్నే వెలిబుచ్చారు.  ఉప ముఖ్యమంత్రి దామోదర రాజనరసింహ మాత్రం తెలంగాణా రాష్ట్ర అవతరణ చాలా అవసరమన్న విషయాన్ని దిగ్విజయ్ సింగ్ తో రెండు గంటల సేపు చర్చించారు.  మంత్రి పొన్నాల లక్ష్మయ్య, తెలంగాణా ఈ సారి వచ్చి తీరుతుందన్న ధీమాను వ్యక్తంచేసారు. 

సీమాంధ్ర మంత్రులు విభజన జరగదనే ఉద్దేశ్యాన్ని వెలిబుచ్చుతూనే అలా జరగనివ్వవద్దని సోనియాగాంధీకి లేఖ రాసారు.

ఇవన్నీ చూస్తుంటే స్పష్టంగా తెలుస్తున్నది ఒక్కటే- కాంగ్రెస్ పార్టీకే స్పష్టత ఇంకా రాలేదని. 

 -శ్రీజ