బాలీవుడ్ ఖాన్ లు ఒక్కటయ్యారు...

Posted: 07/22/2013 02:24 PM IST

సినిమా హీరోల మధ్య చిన్న చిన్న వివాదాలు చోటుకుంటాయి. దాంతో వారి మధ్య దూరం పెరిగిపోయి అంటి ముట్టనట్లుగా వ్యవహరిస్తారు. కానీ ఆ ఆవేశం క్షణకాలమే ఉంటుంది. కొన్ని సార్లు చాలా ఏళ్ళ వరకు ఉంటుంది. అలాంటి సంఘటనే బాలీవుడ్ స్టార్ హీరోలు అయిన షారూఖ్ ఖాన్ - సల్మాన్ ఖాన్ ల మధ్య ఎప్పుడో ఐదు సంవత్సరాల క్రితం 2008లో కత్రినా కైఫ్ బర్త్ డే పార్టీలో గొడవ పడ్డారు. అప్పటి నుండి ఎడ మొహం పెడ మొహంగా ఉంటున్నారు . అప్పట్లో ఈ సంఘటన పెద్ద దుమారమే రేపింది. అప్పట్లో సల్మాన్ లవర్ గా ఉన్న కత్రినా బర్త్ డే పార్టీలో ఈ సంఘటన జరగడంతో  ఆమె కోసమే గొడవ పడ్డారని అనుకున్నారు .

నిన్న రాత్రి ముంబయిలోని ఓ స్టార్ హోటల్లో బాబా సిద్ధికి ఇచ్చిన పార్టీకీ బాలీవుడ్ ప్రముఖులతో పాటు ఈ ఇద్దరు హాజరయ్యారు. ఈ పార్టీలో షారూక్ కంటే కాస్తంత లేటుగా వచ్చినసల్మాన్  అక్కడికి రాగానే అందరూ మర్యాద పూర్వకంగా  లేచి నిలబడ్డారు. అక్కడే ఉన్న షారూఖ్ ని చూసిన సల్మాన్ ఒక్కసారిగా  షారూఖ్ ని ఆలింగనం చేసుకున్నాడు.. షారూఖ్ కూడా తన చిరకాల స్నేహితున్ని వాత్సల్యంతో గుండెకు హత్తుకుని  తమ వైరానికి ముగింపు పలికాడు. దీంతో వీరిద్దరి మధ్య తెర లేచిన కల్లోలానికి తెర పడినట్లేనని అక్కడ ఉన్న వారు తెగ ఆనందపడిపోయారు.  విభేదాలను పక్కనపెట్టి స్నేహితులిద్దరూ మళ్లీ ఏకమవడంతో షారూఖ్, సల్మాన్ అభిమానులు ఆనందం వ్యక్తం చేస్తున్నారు. ఈ సంఘటనతో పార్టీ ఇచ్చిన బాబా సిద్ధికి ఆనందానికి అవధులు లేకుండా పోయాయని అంటున్నారు.