తెలంగాణ అడకత్తెరలో పార్టీలు

Posted: 07/03/2013 10:30 AM IST

చాలా కాలంగా ప్రత్యేక తెలంగాణా రాష్ట్రం విషయంలో వ్యాఖ్యానాలు చెయ్యని పార్లమెంటు సభ్యులు లగడపాటి రాజగోపాల్ మంగళవారం ఆ దిశగా మాట్లాడారు.  త్వరలో కేంద్రం ఈ విషయంలో భారమంతా రాష్ట్ర ప్రభుత్వం మీద వెయ్యబోతున్నదని, ఒక వేళ ఆంధ్రప్రదేశ్ నుంచి తెలంగాణా రాష్ట్రం విడిపోయినట్లయితే తాను రాజకీయ సన్యాసం చేస్తానని అన్నారు. 

అంటే రాష్ట్రం విడిపోవటం జరగదని అర్థం చేసుకోవచ్చు.  గతంలో రాష్ట్రంలో జరిగిన ఎన్నికల సందర్భంలో లగడపాటి సర్వేలు, అంచనాలు నిజమయ్యాయి.  ఆయన కాంగ్రెస్ పార్టీలో ఉన్నా, అంచనాలు మాత్రం కాంగ్రెస్ కి వ్యతిరేక ఫలితాలు ఇస్తాయన్న సమాచారం అందినప్పుడు ఆయన దాన్నే ప్రకటించారు కానీ ఇతర కాంగ్రెస్ నాయకుల లాగా కాంగ్రెస్ గెలిచి తీరుతుందని అనలేదు. 

ఇప్పుడు కూడా తెలంగాణా విషయంలో ఆయన చెప్తున్నది నిజమే అయినట్లయితే, కేంద్ర ప్రభుత్వం తాజాగా రాష్ట్ర శాసన సభలో రాష్ట్ర విభజన మీద ప్రతిపాదన పెట్టమని కోరవచ్చు.  రాష్ట్ర విభజన విషయంలో సర్వసమ్మతి లభించలేదు కాబట్టి మరోసారి రాష్ట్ర శాసనసభలో ప్రతిపాదన పెట్టి పోలింగ్ లో వచ్చిన ఓట్లను బట్టి పార్లమెంటులో ప్రతిపాదన పెడతామని అనే అవకాశం ఉంది.  అదేగనక జరిగితే తెలంగాణా విషయంలో పార్టీల ముసుగులో గుద్దులాటలన్నిటికీ చెక్ పడుతుంది. 

తెలుగుదేశం పార్టీ లోగడ తెలంగాణాకు అనుకూలంగా ఇచ్చిన లేఖను ఉపసంహరించుకోవలసిందిగా లగడపాటి కోరారు.  అలాగే ఇతర నాయకులను కూడా రాష్ట్రాన్ని సమైక్యంగా ఉంచే దిశగా ఓటు వెయ్యమని కూడా ఆయన కోరారు.  అదే జరిగిన పక్షంలో తెలంగాణాలో ప్రాంతంలో ఆయా పార్టీల మనుగడ ప్రశ్నార్ధకమే అవుతుంది. 

ఒకే దెబ్బకు అనేక పిట్టలు.  ఇటు తెలంగాణా విషయంలో రాష్ట్రం నుంచి ఒత్తిడి రాకుండా ఉంటుంది, అటు ప్రతిపక్షాలన్నీ ఇరుకునపడతాయి. 

భాజపా అప్పుడే రెండు వైపులా నరుక్కొచ్చే ప్రయత్నంలో భాగంగా తిరుపతి నుంచి ఆంధ్రా ప్రాంతాలలో కూడా ప్రచారం మొదలుపెట్టి, తెలంగాణా తెచ్చేది మేమే అంటూ తెలంగాణా ప్రాంత ప్రజల సద్భావన కోసం చేసిన ప్రకటనల వలన ఆంధ్రాప్రాంతంలో పార్టీకి నష్టం కలుగకుండా ఉండే ప్రయత్నం చేస్తోంది.

-శ్రీజ