తాళికాదు, తంతు కాదు వివాహాన్ని నిర్ణయించేది

Posted: 06/21/2013 03:52 PM IST

న్యాయస్థానాలంటే అత్యంత గౌరవాన్ని ప్రదర్శించే మన దేశంలో బహుశా ఇదే మొదటి సారనుకుంటా ఇలా ఒక కోర్టు నిర్ణయాన్నిదేశమంతా నవ్వులాటగా తీసుకోవటం. 

లైంగిక సంబంధం వివాహబంధమంత పటిష్టమైనదని చెన్నై హైకోర్టు చెప్పటం మీద పలువురు పలు రకాలుగా వ్యాఖ్యానాలు చేసారు.  అయితే నాకు పెళ్ళైపోయిందోచ్ అంది నటి పూనమ్ పాండే ట్విట్టర్లో.  అంటే ఆ ముచ్చట్లన్నీ తీరిపోయాయని చెప్పేసింది సగర్వంగా.  

పెళ్ళి చెప్పకుండా చేసుకుంటున్నాం రిసెప్షన్ అందరితో కలిసి చేసుకుందాం అనే వ్యాపార ప్రకటనలోలాగా, ఒకవేళ మేజర్లైన ఆడ, మగ లైంగిక సంబంధంకాని పెట్టుకున్న తర్వాత ఇక చాల్లే వద్దనుకుంటే కోర్టులో విడాకులు తీసుకోవలసిందే.  పెళ్ళి పదిమందిలో చేసుకోవటమనేది అందరికీ తెలియటానికి చేసే ఒక తంతు మాత్రమే, నిజమైన పెళ్ళి శోభనమే అంటోంది కోర్టు.  

అన్నిటికంటే ముఖ్యంగా ఆ జంట చట్టపరంగా వారి వివాహాన్ని నమోదు చేసుకోవచ్చట. అయితే అందుకు వారు కోర్టులో వారు భౌతికంగా ప్రేమను పంచుకున్న దాఖలాలు సమర్పించాల్సివుంటుందట.  న్యాయపరంగా దంపతులకు ఉంటే సర్వ హక్కులూ వీరికీ ఉంటాయంటోంది కోర్టు.  

అసలీ రకమైన తీర్పు వెలువడటానికి కారణం ఒక మహిళ కోర్టులో మెయింటెనెన్స్ కోసం వేసిన పిటిషన్.  పెళ్ళై ఇద్దరు పిల్లలు కలిగిన తర్వాత ఆ మహిళకు మెయింటెనెన్స ఇవ్వకుండా వదిలేసిన ప్రబుద్ధుని విషయంలో, పెళ్ళి జరిగిందనటానికి సాక్ష్యాధారాలు లేకపోయినా వారి మధ్య వైవాహిక సంబంధం ఉండటం వలన అది వివాహం కిందికే వస్తుందని కోర్టు తీర్మానించింది.  జస్టిస్ కర్ననం ఇచ్చిన తీర్పు ప్రకారం వివాహం జరిగిందనే సాక్ష్యం కన్నా వాళ్ళు దంపతులుగా కలిసున్నారన్నదే వారు వివాహితులనటానికి అసలు ఆధారమవుతుంది.  ఒకే కప్పుకుంద ఉంటూ ఇద్దరు పిల్లలను కన్న తర్వాత పెళ్ళి కాలేదంటే ఎలా చెల్లుతుందని ప్రశ్నించారు జస్టిస్ కర్నన్.

ఈ తీర్పుతో ఆమెకు వివాహిత హోదాయే కాకుండా నెలకి రూ.500.00 మనోవర్తి కూడా లభించింది. 

ఈ కేసులో తీర్పుతో తంతు పెళ్ళి కాదనే కోర్టు వాదనతో సినిమాల్లోని తాళి సెంటిమెంట్ సీన్లు కూడా మారిపోవచ్చు.  బలవంతంగా తాళి కడుతుంటే హీరోయిన్ తలని పక్కకి తిప్పి తప్పించుకునే ప్రయత్నం చెయ్యటం, తాళి విసిరేస్తే వెళ్ళి హీరోయిన్ మెడలో పడితే హతాశులవటం, తాళి పట్టుకుని విలన్ పరిగెట్టుకుంటూ వస్తుంటే హీరోయిన్ ఇంకా వేగంగా పరిగెత్తటం, లేదా హీరో ఏ కత్తినో మరో వస్తువునో విసిరి తాళి హీరోయిన్ మెడలో పడకుండా చెయ్యటం లాంటి సన్నివేశాలకు ఇక స్వస్తి పలకవచ్చు. 

-శ్రీజ