జంప్ జిలానీకీ తేది ఖరారు అయింది

Posted: 05/24/2013 10:11 AM IST

ఆపరేషన్‌ ఆకర్ష్‌ను మొదలెట్టిన టిఆర్‌ఎస్‌ పార్టీలోకి టి కాంగ్రెస్‌ఎంపీలు మంథా జగన్నాథం, జి.వివేక్‌, రాజయ్య, మాజీ పీసీసీ సభ్యుడు అయిన కే. కేశవ రావు టీఆర్ఎస్ పార్టీలో చేరేందుకు ముహూర్తం ఖరారు అయింది. వీరు జూన్ 2వ తేదీన టీఆర్ఎస్ తీర్థం పుచ్చుకోవడానికి సమాయత్తమవుతున్నారు. ఇటీవలే వారు కాంగ్రెస్ పార్టీ అధిష్టానానికి చివరి గడువుగా ఈ నెల 30వ తేదీని పెట్టి, ఆలోగా తెలంగాణ అంశాన్ని తేల్చాలని అల్టిమేటం జారీ చేసిన విషయం తెలిసిందే. గతంలో కూడా ఇలాంటి గడువులను పార్టీ అధిష్టానం పెడచెవిన పెట్టింది. ఇప్పుడు పెట్టిన డెడ్ లైన్ కి కూడా అక్కడి నుండి సమాధానం రావడం లేదు. ఇక చివరి ప్రయత్నంగా కూడా వివేక్, రాజయ్యలు ప్రధాని విందుకు హాజరై అక్కడ అమ్మని కలవాలని చూసిన వీరిని పట్టించుకున్న నాధుడే కరువయ్యారు. దీంతో బాగా కలత చెందిన వీరు రాజకీయ భవిష్యత్తును ఆలోచించి టీఆర్ఎస్ లో చేరేందుకు సిద్ధం అయినట్లు, వీరిని రాక ఇక లాంఛనమే అని టీఆర్ఎస్ పార్టీ వర్గాలు కూడా ధ్రువీకరించాయి. ఇక ఇటీవలే టి. కాంగ్రెస్ ఎంపీలు కేసీఆర్ ఫాం హౌజ్ లో కలిసి దీని పై చర్చించడం, గతంలో కేసీఆర్ కేకే నివాసానికి వెళ్లి పార్టీలోకి రావాలని ఆహ్వానించడం జరిగింది. మొన్న జరిగిన భేటీలో వీరికి కేటాయించబోయే సీట్ల పై కేసీఆర్ భరోసా ఇవ్వడంతో వీరు కూడా గోడ దూకేందుకు రెఢీగా ఉన్నారు. ఇక టీఆర్ఎస్ పార్టీ కూడా ఒకేసారి నలుగురు ఎంపీలు రావడాన్ని ఎంతో ప్రతిష్టాత్మకంగా భావించి, భారీ బహిరంగ సభను నిజాం కళాశాలలో ఏర్పట్లు కూడా చేయడానికి సిద్ధం అయింది. ఈ సభ విజయవంతం అయితే మరింత మందిని టీఆర్ఎస్ లోకి ఆకర్షించాలని చూస్తుంది.