రెడ్డిగారి అహంకారం? నా సత్తా చూపిస్తా?

Posted: 05/09/2013 10:42 AM IST

Political kcr challenges to cm kiran kumar reddy about bayyaram mines

తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర్ రావు , తమ పార్టీ నాయకులను రాబోయో ఎన్నికల సమారానికి తీర్చిదిద్దుతున్నారు. ముందుగా బయ్యారం పై ఉద్యమం సాగించి.. ముఖ్యమంత్రికి కిరణ్ కుమార్ రెడ్డికి తమ సత్తా ఏమిటో చూపించాలని కేసిఆర్ ముమ్మర ప్రయత్నాలు చేస్తున్నారు. బయ్యారం గనుల వ్యవహారంలో ముఖ్యమంత్రి కిరణ్‌కుమార్‌ రెడ్డి అహంకారంతో మాట్లాడుతున్నాడని, భూకంపం అంటే ఏమిటో ఉద్యమం ద్వారా చూపిద్దామంటూ కె.చంద్రశేఖరరావు పార్టీ నాయకులకు పిలుపునిచ్చినట్లు సమాచారం. తెలంగాణ భవన్‌లో జరిగిన రాష్ట్ర కార్యవర్గ సమావేశంలో ఆయన పలు అంశాలపై నాయకులకు దిశానిర్ధేశం చేసినట్లు తెలుస్తోంది. బయ్యారం గనుల నుండి రాయి ముక్కను కూడా విశాఖ ఉక్కుకు తరలిస్తే ఊరుకునే ప్రశ్నే లేదని,

ఈ విషయంలో ప్రజలను సమీకరించి తెరాస ప్రకటించిన ఉద్యమ కార్యాచరణను విజయవంతం చేయాలని ఆయన నాయకులకు సూచించారు. ఈ ఉద్యమాన్ని ఆషామాషీగా తీసుకోవద్దని కేసీఆర్‌ నాయకులను హెచ్చరించారు. తెరాసను మరింత పటిష్టపరిచే వ్యూహంలో భాగంగా ఈనెల 15 నుంచి వచ్చేనెల 2 వరకు పార్టీ కార్యకర్తలకు పెద్దఎత్తున శిక్షణా శిబిరాలు నిర్వహించాలని తెరాస కార్యవర్గంలో నిర్ణయంతీసుకున్నారు. అన్ని నియోజక వర్గాలలో శిక్షణా తరగతులు నిర్వహించాలని, బలహీన వర్గాల నేతలున్నచోట నిర్వహణా వ్యయంలో కొంత మేర పార్టీ భరిస్తుందని కేసీఆర్ తెలిపారు. ఏడువేల నుంచి పదివేల మంది కార్యకర్తలను ఇందులో భాగస్వామ్యం చేయాలని కేసీఆర్ పిలుపు నిచ్చారు. బయ్యారంపై ఉద్యమాన్ని ఉధృతం చేయాలని పార్టీ నిర్ణయించింది. జూన్ 10న జిల్లా కేంద్రాలలో ధర్నాలు, 14న మండల కేంద్రాల్లో ర్యాలీలు నిర్వహించాలని తీర్మానించారు. నిజాం షుగర్స్‌ను ప్రభుత్వం తిరిగి స్వాధీనం చేసుకోవాలని సమావేశం డిమాండ్ చేసింది. జేఏసీ పిలుపనిచ్చిన ఛలో హైదరాబాద్ ఆందోళనను విజయవంతం చేయాలని నిర్ణయించారు.