రాబడి మార్గాన్వేషణలో వార్తాపత్రికలు

Posted: 04/09/2013 04:23 PM IST

వార్తా పత్రికలు కేవలం ప్రకటనలమీదనే ఆధారపడివున్నాయి.  దినపత్రిక వెల చూసుకుంటే దానిలో పేపర్ ఖరీదు కూడా రాదు.  ఇక వార్తలను సేకరించటానికి అయ్యే ఖర్చు, సిబ్బంది జీతాలు, రవాణా, ఇతర ఖర్చులు ఎక్కడినుంచి వస్తాయి.  వీటన్నిటినీ భరించేవి వ్యాపార ప్రకటనలే.  ప్రకటనల ద్వారా వచ్చే సొమ్ముపత్రికను తీర్చిదిద్ది, పాఠకులకు తక్కువ ధరలో అందిస్తూ వార్తా పత్రికలు తమ మనుగడకోసం కావలసిన లాభాలను కూడా ఆర్జిస్తున్నాయి.  దినపత్రిక కొనటానికి అయ్యే ఖర్చు వాటిని రద్దీలో అమ్మనప్పుడు వస్తోందంటే అవి ఎంత తక్కువ ధరకి అందుబాటులో ఉన్నాయో తెలుస్తోంది. 

ఆధునిక కాలంలో డిజిటల్ సాంకేతిక పరిఙానం పెరిగినతర్వాత అచ్చువేసే విధానంలో మార్పు వచ్చినట్లే, పాఠకులలో కూడా మార్పులు వచ్చాయి.  పేపర్ మీద రాసినదంతా చదివే ఓపిక లేక టివి ఛానెల్స్ లో చూడటం మొదలుపెట్టారు.  మొబైల్ ఫోన్లలోనూ టాబ్ లెట్ లోనూ ఇంటర్ నెట్ ద్వారా వార్తలందుతున్నాయి.  ఈ నేపధ్యంలో వార్తా పత్రికలలో ప్రకటనలకు బదులు టివి ఛానెల్స్ కే వ్యాపారస్తులు ఎక్కువ మొగ్గు చూపిస్తున్నారు.  దానితో సర్క్యులేషన్ ప్రతి సంవత్సరమూ పెరుగుతూనేవుంది కానీ, వార్తా పత్రికల రాబడి తగ్గిపోతోంది.  

దీనికి పరిష్కారంగా వార్తా పత్రికలు మనుగడ సాగించటం కోసం డిజిటల్ మార్గాన్ని తొక్కుతున్నాయి.  అందుకే ప్రతి వార్తపత్రిక తమ ప్రింట్ మీడియా మీద కంటే డిజిటలైజ్డ్ మీడియా మీదనే ఎక్కువ దృష్టి సారిస్తున్నాయి.  అందులోనే రాబడిని వెతుక్కుంటున్నాయి.  వ్యాపారస్తులు తమ ఉత్పాదనలను పెంచుకోవటానికి డిజిటల్ పద్ధతిలోనే ప్రకటనలివ్వటం చెయ్యవచ్చు.  దానితో పాటు వార్తా పత్రికలు ఇ కామర్స్ ని కూడా ఉపయోగించవచ్చని అమెరికన్ సర్వే లో తేలింది.  ఇందులో, ఉత్పాదకులు డైరెక్ట్ గా వినియోగదారులతో సంబంధాలను నెలకొల్పుకోవచ్చు.  ఇలాంటి సేవల ద్వారా వార్తా పత్రికలు తమ రాబడిని పెంచుకోవచ్చు. 

అయితే ఇప్పటికే ఈ త్రోవలో ఎన్నో వెబ్ సైట్లు పనిచేస్తున్నాయి.  వార్తా పత్రికలు కూడా ఈ మార్గాన్ని అవలింబచటానికి పూనుకోవటంతో ఆ పరుగుపందెంలో వాళ్ళు జూనియర్లు అయిపోతున్నారు.  అయినా, వార్తా పత్రికలు తముకున్న నెట్ వర్క్ ద్వారా మెరుగైన వార్తలు, విశ్లేషణలు అందించగలుగుతాయి కాబట్టి, వాటికోసం ఆయా డిజిటల్ పేపర్లను చూసే అవకాశం ఎక్కువుంటుందని, తద్వారా రాబడి కూడా పెరిగి, ప్రింట్ మీడియా మీద వచ్చే నష్టాన్ని పూరిస్తుందని ఆశిస్తున్నారు. 

-శ్రీజ