Posted: 04/02/2013 12:07 PM IST

ప్రాణాలు రక్షించే ఔషధాల మీద పేటెంట్ హక్కులా?  పైగా వాటి కొనసాగింపులు !

బ్లడ్ క్యాన్సర్ వ్యాధిగ్రస్తుల ఉపశమనానికి వాడుతున్న స్విస్ కంపెనీ నోవార్టిస్ ఉత్పాదనలు గ్లివెక్ ని భారతదేశంలో 3 లక్షల మంది వాడుతున్నారని అంచనా. దీని ఖర్చు నెలకు లక్ష రూపాయల వరకూ పడుతుంది. కానీ దీర్ఘకాలంగా బాధపడుతున్న బ్లడ్ క్యాన్సర్ రోగులకు ఇది చాలా శక్తివంతంగా పనిచేస్తుంది.

విజయవంతంగా నడిచే మందులను నకలు చేస్తూ మరిన్ని మందులు మార్కెట్ లోకి రాకుండా ఉండటం కోసం ఐదు సంవత్సరాల పేటెంట్ కాల పరిమితి అయిపోయిన తర్వాత ఆయా సంస్థలు మందుల పాళాల్లో స్వల్ప మార్పులతో పేటెంట్ ని మరో ఐదు సంవత్సరాలు పొడిగించటం కోసం చేసే ప్రయత్నం చేసి మరోసారి పేటెంట్ రిజిస్ట్రేషన్ కి వెళ్తారు. ఈ పద్ధతిని ఎవర్ గ్రీనింగ్ అంటారు.

ఈ స్విస్ కంపెనీ కూడా అలాగే మోడిఫికేషన్ చేస్తూ పేటెంట్ కొనసాగింపు కోసం ప్రయత్నించగా పేటెంట్ కార్యాలయం దాన్ని తిరస్కరించింది. దానితో నోవార్టిస్ కంపెనీ చెన్నై ఇంటలెక్చువల్ ప్రాపర్టీ బోర్డ్ గడప తొక్కింది. అక్కడా చుక్కెదురవటంతో స్విస్ సంస్థ మద్రాస్ హైకోర్టుకి వెళ్ళకుండా నేరుగా సుప్రీం కోర్టు తలుపు తట్టింది. కానీ ఈ రోజు సుప్రీం కోర్టు కూడా పేటెంట్ ని తిరస్కరించింది. కొత్తగా తయారు చేసామన్న ఔషధ గుణాలన్నీ పాత దానిలో కూడా ఉన్నాయని జస్టిస్ ఆఫ్తాబ్ ఆలం, జస్టిస్ రంజనా దేశాయ్ ల ధర్మాసనం గమనించింది. కాకపోతే కొత్తగా తయారైన మందుకి త్వరగా కరిగిపోయే గుణముందన్న ఒక్క అంశంలో మాత్రమే ఇది నూతన లక్షణాన్ని తెలియజేస్తోంది కానీ దాని వలన చికిత్సలో ఎటువంటి ప్రయోజనమూ ఉన్నట్టుగా కనిపించటం లేదు. అందువల నోవార్టిస్ అభ్యర్థనను సుప్రీం కోర్టు తిరస్కరించింది.

సంచలనాత్మకమైన ఈ తీర్పు ఎవర్ గ్రీనింగ్ విధానానికి స్వస్తి పలుకుతుందని విశ్లేషకులు భావిస్తున్నారు. దీనివలన ఔషధాలు చాలా తక్కువ ఖరీదులో లభ్యమయ్యే పరిస్థితి నెలకొంటుందని, ఈ జడ్జిమెంట్ ని ఉటంకిస్తూ భవిష్యత్తులో ఎవర్ గ్రీనింగ్ కి చెక్ పెట్టే అవకాశం ఉండవచ్చని అంటున్నారు.

 

-శ్రీజ