Posted: 03/25/2013 12:46 PM IST

మరో ప్రజా ప్రస్థానం పేరిట పాదయాత్ర చేస్తున్న వైయస్సార్ కాంగ్రెస్ పార్టీ నాయకురాలు, వైయస్ జగన్ చెల్లెలు షర్మిళ తన పాదయాత్రలో ఇన్ని రోజులు తెలుగుదేశం పార్టీ అధినేత చంద్రబాబు పై, కిరణ్ కుమార్ రెడ్డి ప్రభుత్వం పై విమర్శలు చేయడమే కాకుండా, గుంటూరు సభలో  సీబీఐ పైన కూడా ఘాటు విమర్శలు చేసింది. అక్రమాస్తుల కేసును దర్వాప్తు చేస్తున్న సీబీఐ జేడీ లక్ష్మీనారాయణ జగన్ కి సంబంధించిన కేసులో ఇంకా విచారణ పూర్తి కాలేదని చేసిన వ్యాఖ్యల పై ఆమె తీవ్రంగా స్పందించారు. మా అన్న వైయస్ జగన్ జైలు కెళ్లి 300 రోజులు పూర్తి కావచ్చినా ఇంకా విచారణ పూర్తి కాలేదని చెబుతున్న సీబీఐ ఇన్ని రోజులు ఏం చేస్తున్నారని, విచారణ చేయకుండా గాడిదలు కాస్తున్నారా అని మండి పడ్డారు. సుప్రీం కోర్టు ఇచ్చిన ఆరు నెలల గడువు కూడా పూర్తవుతుందని, ఈ కేసులో ఇంకా విచారణ పూర్తికాకపోవడం బాధ్యతారాహిత్యమని, కాలయాపన చేయడమేనని అన్నారు. తన అన్నకు బెయిల్ రాకుండా అడ్డుకుంటూ, పార్టీల మనుగడను కాపాడుకునే కుట్రతో అధికార కాంగ్రెస్, ప్రతిపక్ష తెలుగుదేశం పార్టీలు జగనన్నను అబద్ధపు కేసుల్లో ఇరికించి జైలుపాల్జేశాయని.. వీరికి దమ్ము, ధైర్యం ఉంటే జగనన్నను బయటికి తెచ్చి రాజకీయంగా ఎదుర్కోవాలని వైసీపీ నాయకురాలు షర్మి ల సవాల్ విసిరారు . తమకు ఇంత అన్యాయం తలపెట్టిన వీరంతా మట్టి కొట్టుకు పోతారంటూ కాంగ్రెస్, టీడీపీలకు అనేక శాపనార్ధాలు పెట్టారు. ప్రజల అండతో త్వరలోనే జగన్ విడుదల అవుతారని, రాజన్న ఇచ్చిన మాటలను జగనన్న నిలబెడతారని ఆమె అన్నారు.