Posted: 02/10/2013 03:08 PM IST

ఏఐసిసి ఉపాధ్యక్షుడు, అమేథీ పార్లమెంటు సభ్యుడు రాహుల్ గాంధీకి పెళ్లి గడియలు దగ్గర పడ్డట్లుగా కనిపిస్తున్నాయి. స్వయంగా ఆయనే త్వరలో పెళ్లి చేసుకుంటానని చెప్పారు. తన నియోజకవర్గ ప్రజలు ఆయనను పెళ్లి చేసుకోవాలని కోరడంతో ఆయన త్వరలో చేసుకుంటానని మాటిచ్చారు !  నలభైయ్యేళ్ళు నిండినా ఇంత వరకు బ్రహ్మచారిగా ఉంటూ యువరాజుగా పిలవబడుతున్న ఈయనకు కాంగ్రెస్ పార్టీ పెద్దల సమక్షంలో ఈ మధ్యనే పట్టాభిషేకం పూర్తయిన విషయం తెలిసిందే. ఇక రానున్న ఎన్నికల్లో యూపీఏ ప్రభుత్వం గెలిస్తే, దేశ అధ్యక్షుడు ప్రధాని పీఠం అధిరోహించడమే రాహుల్ కి మిగిలి ఉన్న పని. ఏమి ఉన్నా, లేక పోయినా, ఏ వయస్సులో చేయాల్సిన పని ఆ వయస్సులో చేయాలని పెద్దలు అంటుంటారు. కానీ రాహుల్ గాంధీ ఇంత వరకు ఎందుకు పెళ్లి చేసుకోవడం లేదో అర్థం కావడం లేదు. ఈ పశ్న దేశ ప్రజల్నే కాకుండా, ఆయన నియోజక వర్గ ప్రజల్ని తొలిచింది. ఎవరూ ధైర్యం చేసి అడగలేదు. కానీ.... అమేదీ ప్రజలు మాత్రం మొహమాటపడకుండా రాహుల్ మొఖమ్మీదే ఇప్పటికైనా పెళ్లి చేసుకో బాబూ! అని అడిగారు. దీనికి యువరాజు 'త్వరలో...'అంటూ ముక్తసరి సమాధానమిచ్చి ముసిముసి నవ్వులు రువ్వి వెళ్లారు. అమేథీ ఎంపీ అయిన రాహుల్ శుక్రవారం నుంచి నియోజకవర్గంలో పర్యటిస్తున్నారు. శనివారం చౌక్‌మార్కెట్ మీదుగా ఊరేగింపులో వెళ్తున్న రాహుల్...అదే సమయంలో గార్మెంట్స్ షాప్ తెరుస్తున్న దేవీప్రసాద్ కౌశిథాన్‌ను చూసి కుశల ప్రశ్నలు వేశారు. వ్యాపారం ఎలా ఉందంటూ ఆరా తీశారు. దేవీప్రసాద్‌కు గాంధీ వారసులతో మాట్లాడే చనువు ఉంది. దీనిని ఆసరాగా తీసుకుని ' అంతా బాగానే ఉంది. మా కోరిక అంతా ఒక్కటే. ఇప్పటికైనా మీరు పెళ్లి చేసుకోవాలి. మీ పెళ్లి ఊరేగింపు అమేథీలో సాగాలి. మా కోడలు కోసం మేమంతా ఎదురు చూస్తున్నాం. ఇది నియోజకవర్గ ప్రజల కోరిక' అంటూ దేవీప్రసాద్ రాహుల్ ముందు తమ డిమాండ్ పెట్టారు. దీనికి స్పందించిన యువరాజు 'త్వరలో' అంటూ సమాధానమిచ్చారు. మరి రాహుల్ గాంధీ అమేథీ ప్రజల ముచ్చట ఎప్పుడు తీరుస్తారో.. ?