Posted: 02/01/2013 05:58 PM IST

తెలంగాణ కాంగ్రెస్ ఎంపీల రాజీనామా పర్వం కొనసాగుతూనే ఉంది.   తెలంగాణ కోసం రాజీనామా చేస్తామని కొంతమంది ఎంపీలు అంటున్నారు. మరి కొంత మాత్రం ఏ ఇతర రాజకీయ పార్టీల  కోసమో, 2014 ఎన్నికల కోసమే  మేం  రాజీనామాలు చేయం. కానీ తెలంగాణ ప్రజల కోసమే మేం రాజీనామా చేస్తామని  ప్రకటనలు చేస్తున్నారు.  ఈ రాజీనామాల పర్వం పై  ఢిల్లీ పెద్దలు నీళ్లు చల్లపనిలే నిగమగ్నమైనట్లు తెలుస్తోంది.   కేరళ వైద్యుడు  వాయలార్ రవి కొంతమందికి  వైద్యం చేసినట్లు సమాచారం.  మరికొంత మంది  ఎంపీలకు  ఆయన వైద్యం చేసే  పనిలో బిజీగా ఉన్నారు. ప్రత్యేక తెలంగాణ అంశంపై చర్చల ప్రక్రియ జరుగుతూనే ఉందని కాంగ్రెస్ సీనియర్ నేత, రాష్ట్ర వ్యవహారాల ప్రత్యేక పరిశీలకులు వాయలార్ రవి పేర్కొన్నారు. ఇదే విషయమై ఎంపీ మధుయాష్కి తనను కలిసి తెలంగాణపై పరిస్థితిని వివరించారని అన్నారు. తెలంగాణపై కాంగ్రెస్ పార్టీ వైఖరి స్పష్టంగా ఉందని వాయలార్ తెలిపారు. వాయలార్ రవి మాట్లాడుతూ యూపీఏ భాగస్వామ్య పక్షం ఎన్‌సీపీ తెలంగాణకు మద్దతు ప్రకటించడాన్ని ఆయన ఆహ్వానించారు. పార్లమెంట్‌లో జరగాల్సిన ప్రక్రియకు ఎన్సీపీ మద్దతు దోహదపడుతుందని అన్నారు. తెలంగాణ అంశాన్ని తిరస్కరించినట్టు ఏనాడూ కాంగ్రెస్‌ చెప్పలేదని వాయలార్ రవి వివరణ ఇచ్చారు. అన్ని పార్టీల మద్దతు లభిస్తే పార్లమెంట్‌లో బిల్లు ఆమోదం పొందేందుకు పరిస్థితి అనుకూలిస్తుందని ఆయన అభిప్రాయపడ్డారు.

 

రాజీనామాల విషయంలో ఎంపీ మధుయాష్కితో మాట్లాడానని, ఎవరూ రాజీనామాలు చేయనవసరం లేదని, మిగిలిన వారితో త్వరలో మాట్లాడతానని రవి అన్నారు. టీఆర్ఎస్‑ను కాంగ్రెస్‑లో విలీనం చేస్తామన్న ప్రకటనను ఆహ్వానిస్తున్నామని ఆయన తెలిపారు. దీర్ఘకాలిక ప్రయోజనాల దృష్ట్యా ఈ ప్రతిపాదన చాలా ఉపయోగకరమన్నారు. విద్యార్థుల ఆత్మహత్యలు బాధాకరమని, ప్రజలు సంయమనం పాటించాలని ఆయన విజ్ఞప్తి చేశారు. త్వరలోనే తాను, గులాం నబీ ఆజాద్ మూడు ప్రాంతాల నేతలతో చర్చిస్తామన్నారు. తెలంగాణపై నిర్ణయం బడ్జెట్ సమావేశాలకు ముందా, తర్వాత అనేది కేంద్ర హోంమంత్రి షిండే చెప్పాలన్నారు.  త్వరలో ముఖ్యమంత్రి కిరణ్ కుమార్ రెడ్డి, ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ ఇతర సీనియర్ నేతలతో తెలంగాణ విషయమై మాట్లాడతారని వాయలార్ చెప్పారు. సంప్రదింపుల తేదీల గురించి కేంద్రమంత్రి గులాం నబీ ఆజాద్‌ను అడగాలని ఆయన తెలంగాణ ఎంపీలకు సూచించారు. ఆయనే ఇంఛార్జ్ కాబట్టి ఆయనే చెబుతారన్నారు. కాంగ్రెసు పార్టీ వైఖరిని చాకో స్పష్టం చేశారన్నారు.