Posted: 12/21/2012 07:29 PM IST

జగన్‌ అక్రమాస్తుల కేసు కీలక మలుపు తిరిగింది. ఈ కేసులో నిందితుడిగా ఉన్న ఐఆర్‌ఏఎస్‌ కేవీ బ్రహ్మానందరెడ్డి ప్రాసిక్యూషన్‌కు కేంద్రం అనుమతి ఇచ్చింది. రాష్ట్రపతి ఆమోదంతో కేంద్ర రైల్వే శాఖ మంత్రిత్వ శాఖ ఇందుకు అనుమతించింది. జగన్‌ ఆస్తుల కేసులో బ్రహ్మానందరెడ్డి కీలక నిందితుడిగా ఉన్నాడు. ఈ కేసులో అరెస్టు అయి చంచల్‌గూడ జైల్లో ఉన్నాడు. సీబీఐ దర్యాప్తు కేసుల్లో ప్రాసిక్యూషన్‌కు తొలిసారి కేంద్రం అనుమతి ఇచ్చింది. దివంగత వైఎస్‌ హయాంలో బ్రహ్మానందరెడ్డి మౌలిక వసతులు, పెట్టుబడుల శాఖ ప్రత్యేక కార్యదర్శిగా పని చేశారు. వాన్‌పిక్‌కు అనుకూలంగా ఆయన వ్యవహరించారనే అభియోగాలు ఉన్నాయి. జగన్‌, ఎమ్మార్‌, ఓఎంసీ కేసుల్లో నిందితులుగా పలువురు ఐఏఎస్‌లు ఉన్న విషయం తెలిసిందే. అయితే ఇందులో ఇప్పటి వరకు ఎవరికీ ప్రాసిక్యూషన్‌కు కేంద్రం అనుమతి ఇవ్వలేదు.