Posted: 11/23/2012 03:25 PM IST

ప్రజా సమస్యలు తెలుసుకొనేందుకుగాను టిడిపి అధినేత చంద్రబాబునాయుడు వస్తున్నా మీ కోసం అంటూ పాదయాత్ర సాగిస్తోంటే మా కోసం వెళ్తున్నామంటూ నాయకులు ఆ పార్టీని వీడుతున్నారు. పార్టీని బలోపేతం చేసేందుకు బాబుతో వెన్నంటి ఉండాల్సిన నాయకులు తమ ప్రయోజనాలు చూసుకొంటున్నారు. టిడిపిలో బలమైన నాయకులపై ప్రత్యర్థులు వలవేస్తున్నారు. అంతేకాదు ఆ పార్టీలు ఆడుతున్న మైండ్ గేమ్ లో టిడిపి నేతలు కొట్టుకుపోతున్నారు. ప్రత్యర్థులకు ధీటైన జవాబు చెప్పడంలో టిడిపి వెనుకబడుతోందని రాజకీయ విశ్లేషకులు అభిప్రాయపడుతున్నారు. ప్రత్యర్థుల ఎత్తుగడలను దేశం అంచనావేయలేకపోతోందని నష్టం జరిగాకే పార్టీ రంగంలోకి దిగుతోందన్న వాదనలూ ఉన్నాయి. వచ్చే ఎన్నికల్లో అధికారమే లక్ష్యంగా చంద్రబాబునాయుడు చేస్తోన్న ప్రయత్నాలను ప్రత్యర్థులు మైండ్ గేమ్ తో దెబ్బతీస్తున్నారు. ఈ గేమ్ లకు చెక్ పెట్టాలని టిడిపి భావిస్తోంది. కాని, దానికి తగ్గ ప్రతివ్యూహాం మాత్రం అమలుచేయడంలేదన్న అభిప్రాయాలు వ్యక్తమవుతున్నాయి. పార్టీ సీనియర్ నాయకుడు పయ్యావులకేశవ్ సైతం  ప్రత్యర్థులకు ధీటుగా జవాబిచ్చేపరిస్థితి లేకుండా పోయిందని ఉదాహరణలతో వివరిస్తున్నారు. మరోవైపు పార్టీని వీడాలని భావిస్తున్న నాయకులతో ఆయా స్థాయిల్లోని నేతలు చర్చించాలని అధినేత చంద్రబాబు ఆదేశించారు. వలసలు తాత్కాలికంగా ప్రత్యర్థులకు కలిసివచ్చినా దీర్ఘకాలికంగా తమకే అచ్చివస్తోందని తెలుగుతమ్ముళ్ళు చెప్పుకొస్తున్నారు. మొత్తానికి టిడిపి ఎన్నో సంక్షోభాలను అధిగమించిందని త్వరలోనే అన్ని సమస్యలు సద్దుమణిగి పార్టీకి మంచిరోజులొస్తాయని టిడిపి నేతలన్నారు.