Posted: 11/19/2012 11:13 AM IST

యూపీఏ ప్రభుత్వంపై అవిశ్వాస తీర్మానం  తెచ్చెందుకు  ప్రయత్నిస్తున్న   మమతా బెనర్జీ  అందుకు వివిధ  పార్టీల మద్దతును  కూడగట్టే పనిలో నిమగ్నమయ్యారు.  ఈ క్రమంలో ఫైర్‌బ్రాండ్ నాయకురాలు, తృణమూల్ అధినేత్రి మమతా బెనర్జీ.. లోక్‌సభలో విపక్ష నేత సుష్మాస్వరాజ్‌కు ఫోన్ చేశారు. యూపీఏ ప్రభుత్వంపై తాము ప్రవేశపెట్టే అవిశ్వాస తీర్మానానికి మద్దతివ్వాలని ఆమెను కోరారు. ఈ విషయం బీజేపీ సీనియర్ నేత మురళీ మనోహర్ జోషి స్వయంగా వెల్లడించారు. అయితే, సుష్మాస్వరాజ్ ప్రస్తుతం బాల్ ఠాక్రే అంత్యక్రియలకు హాజరయ్యేందుకు ముంబై వెళ్లినందున, ఆమె ఢిల్లీ వచ్చాక తామంతా ఈ విషయంపై చర్చిస్తామని జోషి చెప్పారు. ఒకటి రెండు రోజుల్లో దీనిపై ఎన్డీయే సమావేశం జరుగుతుందన్నారు. అవిశ్వాస తీర్మానాన్ని గెలిపించేందుకు కావల్సిన మెజారిటీ ఉందా అన్న ప్రశ్నకు.. అందుకే దీనిపైస చర్చిస్తామని అన్నారు. సంఖ్యాబలం సరిపోని పక్షంలో ప్రభుత్వం మరో ఆరునెలల వరకు సురక్షితంగా ఉంటుందని.. ఒకవేళ ప్రభుత్వం పడిపోతే తర్వాత ఏం చేయాలో కూడా ఆలోచించాల్సి ఉందని ఆయన అన్నారు.

ఎస్సీ, బీఎస్సీలు యూపీఏకు బయటనుంచి మద్దతిస్తున్నందున ఇప్పుడు అవిశ్వాస తీర్మానం పెట్టాలన్న టీఎంసీ ఆలోచన సరైనదేనా అని అడగ్గా, ఎఫ్‌డీఐలను వ్యతిరేకించడం సరైనదేనని. అయితే ఒకవేళ వాళ్లు అవిశ్వాసం పెడితే పరిణామాలను ఆమోదించాల్సింది కూడా వారేనని జోషి చెప్పారు.మమతా బెనర్జీ ఇటు బీజేపీతోను అటు వామపక్షాలతోను కలిసి ప్రవేశపెట్టాలని చూస్తున్న అవిశ్వాస తీర్మానం 305 మంది ఎంపీల బలం కింద పడి కుప్పకూలుతుందని కాంగ్రెస్ అధికార ప్రతినిధి షకీల్ అహ్మద్ వ్యాఖ్యానించారు. కేవలం 19 మంది సభ్యులున్న తృణమూల్ లాంటి పార్టీ అవిశ్వాసం పెడతామని ప్రకటించిందంటే, అది కేవలం బీజేపీ, సీపీఎంలతో వారి సాన్నిహిత్యాన్నే చూపిస్తోందని ఆయన విమర్శించారు. తాము విశ్వాసం పొందాలంటే కేవలం 272 మంది సభ్యుల మద్దతు సరిపోతుందని, కానీ.. ఆర్జేడీ, ఎస్పీ, బీఎస్పీ, జేడీ (ఎస్)లతో కలిపి తమకు 305 మంది మద్దతు ఉందన్నారు. అందువల్ల ప్రభుత్వం పూర్తికాలం అధికారంలో ఉంటుందని విశ్వాసం వ్యక్తం చేశారు.