Posted: 10/09/2012 08:45 PM IST

టాలీవుడ్ సినిమా హీరోగా ఎంట్రీ ఇచ్చి మెగాస్టార్ గా ఎదిగి ఎంతో మంది గుండెల్లో చిరంజీవి గా నిలిచిన కొనిదల శివశంకర ప్రసాద్ అంటే తెలియని వారు ఉండరంటే అతిశయోక్తి లేదు. అంతటి ప్రజాధరణ కలిగిన చిరంజీవి సినిమాలకు స్వస్తి చెప్పి ప్రజా సేవ చేయడానికి రాజకీయంలోకి తనదైన స్టైల్లో ఎంట్రీ ఇచ్చి, ప్రజారాజ్యం పార్టీని స్థాపించి, 2009 ఎన్నికల్లో ఆంధ్రప్రదేశ్ అంతటా పోటీ చేసి, ఆ పార్టీ అధినేతగా రాష్ట్రం అంతటా తిరిగి... 18 అసెంబ్లీ సీట్లు గెల్చుకున్నాడు. ఆ ఎన్నికలలో చిరంజీవి సీఎం అవుతారని అనుకున్నారంతా ? కానీ అది బెడిసి కొట్టింది. అయినా మొక్కవోని ధైర్యంతో ప్రజా సమస్యల పై పోరాడారు. తరువాత కాలంలో అదే పార్టీతో పోరాటం చేస్తే ప్రజా సమస్యలను పరిష్కరించలేనని భావించి.... ప్రస్తుతం అధికారంలో ఉన్న కాంగ్రెస్ పార్టీలో తన పార్టీని విలీనం చేసి సేవలందిస్తున్నారు..

ఇంత వరకు ఓకె.... కానీ కాంగ్రెస్ లో ఎన్నో ఆశలతో పార్టీని విలీనం చేసిన చిరంజీవికి అందులో దిగాక తెలియలేదు... కాంగ్రెస్ నిజ స్వరూపం. ఎన్నో మాటలు ఇచ్చిన కాంగ్రెస్ పార్టీ ఒక్క మాట నిలబెట్టకోక పోగా... చివరకు ఏదో మొక్కుబడిగా రాజ్యసభ సీటు కట్టబెట్టి చల్ల బర్చారు. ప్రస్తుతానికైతే ఏం ఢోకా లేదు చిరుకి. కానీ 2014 ఎన్నికలు సమీపిస్తున్నాయి.... మరి ఆ ఎన్నికలలో చిరు రాజకీయ భవిష్యత్తు ఏమిటి ? ఆ ఎన్నికలలో చిరంజీవి కాంగ్రెస్ పార్టీ నుండి పోటీ చేస్తారా ? లేక కష్టాల్లో ఉన్న కాంగ్రెస్ ని ఆపద్భాందవుడిలా  ఆదుకున్నందుకు సోనియా గాంధీ ముఖ్యమంత్రి అభ్యర్థిగా పోటీ చేయిస్తారా ? ఇదే అంశం ఇప్పుడు రాజకీయ వర్గాల్లో హాట్ టాపిక్ అయింది. ఈ చర్చల్లో చిరంజీవికి సానుకూలంగా ఎక్కడా ఫలితం రావట్లేదని అంటున్నారు ? కారణం ఏంటంటే... కాంగ్రెస్ పార్టీలో తన పార్టీని విలీనం చేసిన తరువాత ఆ పార్టీలో తనదైన ముద్రను వేసుకోక  (కాదు కాదు కాంగ్రెస్ నాయకులు ఎదగనివ్వక) పోవడమే అనే అభిప్రాయాలు వ్యక్తం అవుతున్నాయి. అవును చిరంజీవిని కాంగ్రెస్ నాయకులు అవసరం ఉన్నప్పుడు ఒక ట్రంప్ కార్డులా వాడుకొని వదిలేస్తున్నారు. ఇక ప్రజల్లోకి వెళ్ళి సమస్యల పై పోరాడదామంటే.... రాజ్యసభ సభ్యుడిగా చేర్చుకొని ప్రజల్లోకి వెళ్ళకుండా చేశారు. ఇలాగే ఉంటే... 2014 వరకు చిరంజీవిని ఒక రాజకీయ నాయకుడిగా ప్రజలు అంతగా గుర్తుపెట్టురు. మరి దాని తరువాత ఆయన భవిష్యత్తు ఏమిటన్నది కాలమే నిర్ణయించాలి.