Posted: 02/29/2012 02:54 PM IST

బలవంతుడ నాకేమని

పలువురతో నిగ్రహించి పలుకుట మేలా

బలవంతమైన సర్పము

చలిచీమల చేతజిక్కి చావదె సుమతీ

బలవంతుడ నాకేమని- నేను బలం కలిగిన వాడిని నామేమవుతుంది అని, పలువురతోన్- చాలామందితో, నిగ్రహించి- ఎదిరించి, పలుకుట- మాట్లాడటం, మేలా- మంచిదా, బలవంతమైన సర్పము- బలంగల పెద్దపాము కూడా, చలిచీమల చేతజిక్కి- చిన్న చీమలకు చిక్కి, చావదె- ప్రాణాలు పోగొట్టుకోవటం లేదా.

పెద్దపామైనా చిన్న చీమలకు చిక్కితే చచ్చిపోతుంది కాబట్టి, నేకేమిటి నేను బలవంతుడను అని అందరినీ ఎదిరించటం మంచిది కాదు.

బలం ఉండటమంటే కేవలం శారీరకమైన శక్తే కాదు, బంధు మిత్ర బలగం, అధికార హోదా, ధనం వలన కలిగే దర్పం, ఎక్కువ చదువుకుని ఙానినైనానన్న గర్వం - ఇలాంటి వాటివలన కూడ మనిషి విర్రవీగే అవకాశం ఉంది. కానీ ఎంత పెద్ద స్థాయిలో ఉన్నవాడైనా ఒక్కోసారి చిన్నవాడి చేత కూడా దెబ్బతినవచ్చు అన్న విషయాన్ని చెప్పటానికి చిన్న చిన్న చీమల చేతిలో పెద్ద సర్పంకూడా ప్రాణాలు పోగొట్టుకుంటుంది కదా అని ఉదాహరణతో తెలియజేసారు శతకకర్త.

పూర్వకాలంలోని స్థితిగతులనుబట్టి అప్పటి ఉదాహరణలు ఉండేవి. ప్రకృతితో మమేకమై జీవించే కాలం కాబట్టి అప్పట్లో చెట్లు, చేమలు, నదులు, జంతువులు ఇలాంటివాటితోనే చెప్పదలచుకున్న నీతి వాక్యాలను చెప్పేవారు. దీన్నే ఈకాలంలో చెప్పాలంటే, రాజకీయాల్లో ఎంతో పైకి ఎదిగి, అక్రమంగా ఎంతో ఆర్జించిన మనిషి, ఇక తనకేమీ కాదులే అనుకుంటే, సాధారణమైన ఒక చిన్న వ్యక్తి వేసిన ప్రజాప్రయోజన వ్యాజ్యం కూడా ఆ పెద్ద మనిషిని కిందికి దించేయగలదు.

-శ్రీజ