Posted: 02/01/2012 03:05 PM IST

కమలములు నీటబాసిన

కమలాప్తుని రశ్మి సోకి కమలిన భంగిన్

దమతమ నెలవులు దప్పిన

దమ మిత్రులె శత్రులౌట తథ్యము సుమతీ

కమలములు- తామరపువ్వులు, నీటబాసిన- నీటిలోంచి బయటకు వచ్చినట్లయితే, కమలాప్తుని రశ్మి సోకి- తామరపువ్వులకు బంధువైన సూర్య రశ్మి సోకి నప్పుడు, కమలిన భంగిన్- కమిలిపోయినట్లుగా, తమతమ నెలవులు- తమ స్థానాలను దప్పిన- తప్పిపోయినట్లయితే, తమ మిత్రులె- తమ ఆప్తులే, శత్రులౌట తథ్యము- శత్రువులుగా మారటం తప్పనిసరిగా జరుగుతుంది.

తామరపూవులు నీటిలో ఉన్నంతసేపూ సూర్యరశ్మి వాటికి ఎంతో తోడ్పడుతుంది. తామరపూవులను వికసించేట్టుగా చేస్తుంది. కానీ ఆ నీటిలోంచి బయటకు రాగానే అదే సూర్యరశ్మి వలన ఆ పూవులు మాడిపోతాయి. అంటే తన స్థానంలో ఉన్నంతవరకే ఆప్తులైనా, బంధువులైనా, స్నేహితులైనా. ఆ స్థానాన్ని విడిచిపెట్టినప్పుడు వాళ్ళే శత్రువులుగా మారవచ్చు.

ఇది అధికారంలో ఉన్న ఉద్యోగస్తులకు బాగా అనుభవంలోకి వస్తుంది. అధికారంలో ఉన్నంతసేపూ ఆ మనిషి కృపా వీక్షణాలకోసం, చెలిమి కోసం ఆరాటం చూపించేవారే అధికారంలోంచి తొలగిపోగానే నిర్లక్ష్యం చెయ్యటమే కాదు అతని మీద అభాండాలు కూడా వేస్తుంటారు. అందువలన, స్థానాన్నిబట్టి లభించే స్నేహం మీద ఎక్కువగా ఆశలు పెంచుకోవద్దని కూడా శతకకర్త సూచిస్తున్నారు.

-శ్రీజ