Posted: 03/15/2012 10:25 AM IST

మంత్రి జానారెడ్డి జనాలకు అర్థమయ్యే విషయాలను కూడా అర్థం కానట్టుగా మాట్లాడి గందరగోళంలో పడేస్తుంటారని ప్రతీతి. తనకు ఇబ్బంది అనిపించే విషయాల్లో ఆధ్యాత్మిక, తాత్విక విషయాలను జోడించి మాట్లాడుతూ తప్పించుకుంటుంటారు. అసెంబ్లీ లాబీల్లో సరిగ్గా ఇదే జరిగింది. సుప్రీంకోర్టు నోటీసులతో మంత్రులు తీవ్ర గందరగోళంలో పడిన సమయంలో జానా తన చాంబర్లో డీఎల్ రవీంద్రారెడ్డి, మరికొందరు ఎమ్మెల్యేలతో భేటీ అయ్యారు. కొందరు విలేకరులూ చేరుకున్నారు. ఓ విలేకరి ఈ నోటీసుల పరిణామాలు చివరకు ఎక్కడికి దారితీస్తాయి సార్! అని అడగడంతో జానారెడ్డి ఒక్కసారిగా మాటలు మార్చేశారు. ‘‘సత్యము అసత్యము.. ధర్మము అధర్మము.. మంచి చెడు.. వీటి మధ్య అనాదిగా పోరాటం సాగుతోంది. కొన్ని సందర్భాల్లో అసత్యము సత్యంగా గోచరిస్తుంటుంది. సత్యం కొన్నిసార్లు కిందికి నెట్టేయబడుతుంది.

అసత్యం తానే అసలైన దానినంటూ పైకి వస్తుంది. సత్యమైన దానినీ ప్రజలు అసత్యంగా భావించే రోజులుంటాయి. అంతమాత్రాన అసత్యం సత్యమైపోదు. అధర్మం ధర్మమైపోదు. మళ్లీ పోరాటం ప్రారంభమవుతుంది. సత్యం తిరిగి తెరపైకి వస్తుంది. అంతటితో అసత్యం అణగారిపోయిందనుకుంటాం. కానీ అదే పోరాటం మళ్లీమళ్లీ తప్పదు. ఇలా సత్యం, అసత్యం పరస్పరం కిందా మీదా పడుతూనే ఉంటాయి. ఈ ధర్మం అధర్మం మధ్య మానవలోకం ఎత్తుపల్లాల్లో కొట్టుమిట్టాడుతుంటుంది. మానవులున్నంతకాలం దీనికి అంతులేదు. ఈ సత్యాసత్యాల పోరాటంలో సత్యం నిలబడేలా ప్రతిఒక్కరూ ప్రయత్నించాలి. ధర్మం వైపు మీరంతా ఉంటారనుకుంటున్నాను. అలా నిలబడకుంటే అది మా ఖర్మనుకుంటాం’’ అని చెప్పి ముగించారు. ఆయనిలా చెబుతుండగానే చాంబర్లో కూర్చున్న ఇద్దరు ఎమ్మెల్యేలు జారుకున్నారు. విలేకరులూ తలపట్టుకొని వచ్చేశారు. తరువాత బయటకు వచ్చిన జానారెడ్డిని మరికొందరు విలేకరులు కలసి లోపల ఏం చర్చించారు సార్ అంటూ ఆసక్తిగా అడిగారు. అంతే.. జానారెడ్డి మళ్లీ గీతబోధ ప్రారంభించారు.