Posted: 06/19/2012 11:27 AM IST

ఇప్పుడు అమెరికా చేతిలో  పాకిస్థాన్ చిక్కింది.   పాకిస్థాన్ కు రావలసిన  400 మిలియన్ డాలర్ల చెక్ ను  అమెరికా నిలిపివేసింది. తీవ్రవాదంపై పోరులో చేసిన ఖర్చుకు సంబంధించి పాకిస్తాన్‌కు ఇవ్వాల్సిన 400 మిలియన్ డాలర్ల రీయంబర్స్‌మెంట్‌ను అమెరికా నిలిపివేసింది. ఉభయ దేశాల మధ్య సంబంధాలు దెబ్బతిన్న కారణంగానే అమెరికా ఈ చర్య చేపట్టినట్టు తెలుస్తోంది. ఇప్పటికే తీవ్ర ఆర్థిక ఇబ్బందులతో సతమతమవుతున్న పాకిస్తాన్‌కు అమెరికా చర్య ‘గోరుచుట్టుపై రోకటి పోటు’లా పరిణమించనుంది. సంకీర్ణ బలగాల సహాయక నిధి (సిఎస్‌ఎఫ్) నుంచి ఇవ్వాల్సిన ఈ 400 మిలియన్ డాలర్ల రీయంబర్స్‌మెంట్‌ను అమెరికా పార్లమెంట్ ఇప్పటికీ ‘నోటిఫై’ చేయలేదు. సిఎస్‌ఎఫ్ నుంచి పాత బకాయిలను విడుదల చేయాలంటే అమెరికా పాలనాయంత్రాంగం పార్లమెంట్ నుంచి కనీసం 15రోజుల ముందుగా అనుమతి పొందాల్సి ఉంటుంది. దీంతో ఈ నెల 30తో ముగియనున్న ఆర్థిక సంవత్సరంలో పాకిస్తాన్‌కు ఈ చెల్లింపు జరిగే అవకాశాలు కనిపించడంలేదు. ఈ చర్య కారణంగా పాకిస్తాన్ ద్రవ్యలోటు 0.2 శాతం పెరగనుంది. ఫలితంగా ప్రస్తుత ఆర్థిక సంవత్సరంలో పాక్ ద్రవ్యలోటు స్థూల జాతీయోత్పత్తి (జిడిపి)లో 7.5 శాతానికి చేరుకోనుంది.