Posted: 02/01/2012 12:19 PM IST

యానాంలో కార్మికుల ఆగ్రహానికి లోనైన రీజెన్సీ సిరామిక్స్ కర్మాగారాన్ని యాజమాన్యం నిన్న మూసివేసారు. పరిశ్రమ ప్రధానద్వారం బయట ఈ లాకౌట్ నోటీసుని అంటించారు. బాలల విద్యాసంవత్సరం పోకుండా, వారి భవిష్యత్నుని దృష్టిలో పెట్టుకుని తొలుత రిజెన్సీ విద్యాసంస్థలనైనా నడుపుదామని అనుకున్నా, అందులో పనిచేసే అధ్యాపకులు భయపడుతున్నారని యాజమాన్యం చెప్తోంది. మళ్ళీ ఎక్కడ గొడవలు వస్తాయో అని భయపడటమే కాకుండా, వారిలో కొందరికి బెదిరింపు ఫోన్ కాల్స్ కూడా వచ్చాయని చెప్తున్నారు. కార్మికుల ఆందోళనలో పరిశ్రమకి కలిగిన నష్టం ఎంతన్నది ఇంకా తేలలేదని, అది తేలితే కానీ మళ్ళీ పనులు మొదలుపెట్టే అవకాశం ఉండదని యాజమాన్యం చెప్తోంది.

రీజెన్సీలో మే 2011 నుంచే ఆందోళనలు మొదలయ్యాయి. వారి కోరికల్లో బోనస్, ఇంక్రిమెంట్లకు యాజమాన్యం అంగీకరించినా, కార్మికులు మిగతా కోరికల మీద ఆందోళన చేస్తూ డిసెంబర్ 6 నుంచి పరిశ్రమకు నష్టం కలిగించే విధంగా ప్రవర్తిస్తూ, యంత్రసామగ్రికి నష్టం కలుగజేస్తూ ఉత్పత్తిని తగ్గించేవిధంగా ప్రవర్తిస్తూ వచ్చారని జనరల్ మేనేజర్ హెచ్ ఆర్ తెలియజేసారు. పరిశ్రమనుంచి తొలగించినవారిని తిరిగి పనిలోకి తీసుకోవాలని వారు పట్టుపట్టారని, దానికి అంగీకరించకపోవటంతో జనవరి 27న గేటు దగ్గర నుంచి లోపలికి వెళ్తున్నవారిని అడ్డుకోవటం వల్లనే పోలీసులు కలుగజేసుకోవలసివచ్చిందని ఆయన అన్నారు. బయటనుంచి కూడా వచ్చిన దుష్టశక్తులతో కలిసి పథకం ప్రకారమే సీనియర్లను కొట్టటం, వారి ఇళ్ళను ముట్టడించటం, తగలబెట్టే ప్రయత్నం చేసారని, ఫాక్టరీ లో కూడా చాలా చోట్ల ధ్వంసానికి పూనుకున్నారని, పరిస్థితి అదుపులో లేకపోవటం వల్లనే లాకౌట్ చెయ్యవలసి వస్తోందని అన్నారు. కొందరి దుర్మార్గం వలన మిగతా కార్మికులు కూడా ఉపాధిని పోగొట్టుకోవటం బాధాకరమే కానీ పరిస్థితి అలా ఉన్నదని వివరించారు.

-శ్రీజ