టీ బ్రేక్ లో క్యారెట్ తీసుకోవడం ఆరోగ్యకరం!

Posted: 05/28/2015 02:01 PM IST

ఉద్యోగస్తులు టీ బ్రేక్ సమయంలో రకరకాల స్నాక్స్ తీసుకుంటుంటారు. చాలామంది స్నాక్స్ గా బిస్కెట్లు, బర్గర్లు, ఇంకా ఇతర జంక్ ఫుడ్లు తీసుకుంటారు. అయితే.. వాటిని ప్రతిరోజూ తీసుకుంటే మాత్రం ఆరోగ్య సమస్యలు తప్పవు. అధిక క్యాలరీలు కలిగిన ఆ ఫుడ్స్ నిత్యం తీసుకుంటే.. శరీరంలో కొవ్వు అధికంగా పేరుకుపోయి బరువు పెరుగుతారని నిపుణులు అంటున్నారు. కాబట్టి.. స్నాక్స్ లో జంక్ ఫుడ్లను వదిలేసి క్యారెట్ తీసుకోవాల్సిందిగా నిపుణులు సూచిస్తున్నారు. ఎందుకంటే.. ఇందులో మానవ శరీరానికి కావలసిన పోషక విలువలు ఎన్నో వుంటాయి. అవి.. ఆరోగ్యంగా వుంచడంతోపాటు శరీర బరువును కంట్రోల్ చేస్తాయి. ఇంకా క్యారెట్ తో కలిగే ప్రయోజనాలేంటో తెలుసుకుందాం..

క్యారెట్ తో కలిగే ప్రయోజనాలు :

క్యారెట్‌లో లోక్యాలరీలు, విటమిన్స్, మినిరల్స్ తదితర పోషకాలు పుష్కలంగా వుంటాయి. అవి శరీర బరువును తగ్గించడంలో దోహదపడుతాయి. అలాగే క్యారెట్‌ను తీసుకోవడం ద్వారా దంత సమస్యలను సైతం దూరం చేసుకోవచ్చు. క్యారెట్ క్రిస్పీ, క్రంచీగా ఉండటం ద్వారా దంతాలను శుభ్రం చేయడంతో పాటు దంతాలను ఆరోగ్యంగా ఉంచుతుంది.

ఇకపోతే.. క్యారెట్ జ్యూస్ చర్మ సౌందర్యాన్ని పెంచుతుంది. ఇంకా చర్మం ఆరోగ్యంగా ఉండటానికి నిరంతరం సహాయపడుతుంది. కంటి దృష్టి లోపాలకు క్యారెట్ దివ్యౌషధంగా పనిచేస్తుంది. ఎందుకంటే క్యారెట్‌లో కళ్ళ ఆరోగ్యానికి సహాయపడే విటమిన్ ఏ పుష్కలంగా వుంటుంది. క్యారెట్‌లో బీటాకెరోటిన్, యాంటీఆక్సిడెంట్స్ పుష్కలంగా వుంటాయి. అవి హెల్తీ స్కిన్ పొందడానికి గ్రేట్‌గా సహాయపడుతాయి. క్యారెట్ ముడతలను నివారించడంతోపాటు వృద్ధాప్య లక్షణాలను దూరం చేస్తుంది. అందుచేత రోజూ ఓ గ్లాసులు క్యారెట్ జ్యూస్ తీసుకోవడం ఎంతో మంచిదని ఆరోగ్య నిపుణులు అంటున్నారు.