పాలకూరలో దాగివున్న హెల్దీ బెనిఫిట్స్

Posted: 11/20/2015 04:28 PM IST

ప్రకృతి సహజంగా లభించే ఆకుకూరల్లో పోషక విలువలు సమృద్ధిగా వుంటాయి. అవి వివిధ రకాల రోగాల బారినుంచి రక్షించడమే కాకుండా నిత్యం ఆరోగ్యంగా మెలిగేలా చేస్తాయి. అలాంటి ఆకుకూరల్లో పాలకూర ఒకటి. ఎన్నోపోషకాలు కలిగి వున్న ఈ పాలకూర.. అన్నంలో అల్పాహారం రూపంలో ఎంతో రుచిగా వుండడంతోపాటు వ్యౌషధంలా పనిచేస్తుంది. ఈ పాలకూరలో దాగివున్న పోషకాలు ఎన్నో ప్రయోజనాలను కలిగిస్తాయి.

పాలకూరలో ఉండే ప్లవనాయిడ్లూ, శరీరంలో తయారయ్యే క్యాన్సర్ కారకాలతో పోరాడతాయి. అలాగే.. ఇందులో వుండే యాంటీ ఆక్సిడెంట్లూ, విటమిన్ 'సి', 'ఇ', బీటా కెరొటిన్, మాంగనీస్, జింక్, సెలీనియం చర్మానికి తగినంత తేమను అందించి.. ముడతలు ఏర్పడకుండా కాపాడతాయి. ఆస్టియోపోరోసిస్, రక్తపోటును అదుపులో ఉంచుతాయి. రక్తంలో చక్కెర శాతం అదుపులో ఉంటుంది. పాలకూరలో పీచుశాతం ఎక్కువగా వుంటుంది. కాబట్టి.. తినే ఆహారంలో పాలకూర శాతం పెంచడం వల్ల జీర్ణ వ్యవస్థ మెరుగుపడుతుంది. పొట్ట సంబంధిత సమస్యల నుంచి ఉపశమనం పొందవచ్చు. శరీర బరువును తగ్గించడంలోనూ ఈ పాలకూర కీలక పాత్ర పోషిస్తుందని నిపుణులు చెబుతున్నారు.

పాలకూరను ఎక్కువుగా తినడం వల్ల కంటి సంబంధమైన సమస్యలు తగ్గుతాయి. రక్త కణాల వృద్ధి జరుగుతుంది. దీనిలో లభించే విటమిన్ 'కె' చర్మంలోపలి పొరలను దృఢంగా ఉంచుతుంది. గాయాలైనప్పుడు ఆ ప్రాంతంలో రక్తం గడ్డకట్టడానికి దోహదం చేస్తుంది. నరాల బలహీనత ఉన్నవారు దీన్ని ఎంత ఎక్కువుగా తింటే ఎంతో శ్రేయస్కరమని ఆరోగ్య నిపుణులు అంటున్నారు.