ప్రధాన రాక-మంత్రి గంటా ఫైర్

Posted: 10/30/2013 09:05 PM IST

ప్రధాన మంత్రి మన్మోహన్‌సింగ్ విశాఖపట్నం వస్తున్నారు. వారం రోజుల పాటు ఎడతెరిపి లేకుండా కురిసిన వర్షాలకు దెబ్బతిన్న ప్రాంతాల్లో ఏరియల్ సర్వే చేస్తారు. నష్టాన్ని అంచనా వేసి ఇక్కడే ప్యాకేజీని కూడా ప్రకటించే అవకాశం ఉందని తెలిసింది. ఈ పర్యటనను జిల్లా అధికారులు ద్రువీకరించినా ఇంకా పూర్తి వివరాలు రావలసి ఉందని తెలిపారు. ప్రధానితో పాటు యూపీఏ అధ్యక్షురాలు సోనియాగాంధీ కూడా వస్తారని పార్టీ వర్గాలు పేర్కొంటున్నాయి.

 

అయితే దీన్ని ప్రతిపక్షాలు తీవ్రంగా వ్యతిరేకిస్తుండడంతో ఆమె రాకపోవచ్చునని పలువురు భావిస్తున్నారు. ఆమె ఏ హోదాలో వచ్చి ప్రజల్ని పరామర్శిస్తారని తెలుగుదేశం నాయకులు బండారు సత్యనారాయణమూర్తి తదితరులు ప్రశ్నిస్తున్నారు. అదీగాక రాష్ట్ర విభజనకు ఆమె ప్రధాన కారణమని అంతా భావిస్తున్న తరుణంలో ప్రజల నుంచి వ్యతిరేకత వస్తుందని, అందుకని సోనియా రారని పార్టీ పెద్దలు వ్యాఖ్యానిస్తున్నారు.

 

గంటా ఫైర్

రాష్ట్ర విభజనపై కాంగ్రెస్‌ అధిష్టానం తీరుపై రాష్ట్రమంత్రి గంటా శ్రీనివాసరావు మండిపడ్డారు. ఆ రాష్ట్రంలో ఓ వైపు వరదలు వచ్చి అస్థవ్యస్థ పరిస్థితులు ఉంటే ఇప్పుడు టాస్క్ ఫోర్స్ బృందాన్ని పంపడమేంటని ప్రశ్నించారు. రోమ్‌ నగరం తగలబడుతుంటే నీరో చక్రవర్తి ఫిడేల్‌ వాయించినట్టుగా రాష్ట్రం తగలబడిపోతోంటే కాంగ్రెస్‌ అధిష్టానం రాష్ట్ర విభజన చేయడమేంటని ఆయన మండిపడ్డారు.