చంద్రబాబు కుటుంబసభ్యుల ఆత్మీయ సమావేశం

Posted: 04/26/2013 04:41 PM IST

Telugu desam nara chandrababu naidu to end padayatra with public meeting

టీడీపీ అధినేత చంద్రబాబునాయుడు చేపట్టిన 'వస్తున్నా.. మీ కోసం' పాదయాత్ర శనివారంతో ముగియనుండడంతో విశాఖలో కార్యకర్తలతో ఆత్మీయ సమావేశం ఏర్పాటు చేశారు. 207 రోజుల పాటు తనతో పాదయాత్రలో పాల్గొన్న కార్యకర్తలు, సిబ్బందితో ఆయన కుటుంబసభ్యులు ఆప్యాయంగా ముచ్చటించారు. ఈ సమావేశంలో చంద్రబాబు సతీమణి భువనేశ్వరి, కుమారుడు లోక్‌శ్ పాల్గొన్నారు. కార్యకర్తలకు, సిబ్బందికి స్వయంగా చంద్రబాబు, భువనేశ్వరి భోజనాలు వడ్డించారు. కార్యకర్తలందరినీ పేరు పేరునా పలకరిస్తూ, ఫొటోలు దిగారు. పాదయాత్ర కార్యక్రమం విజయవంతం చేసిన వారందరికీ ధన్యవాదాలు తెలియజేశారు. రేపు జరగబోయే ముగింపు సభకు భారీ ఏర్పాట్లు చేశారు.

207 రోజుల పాటు సుదీర్ఘంగా సాగిన టీడీపీ అధినేత చంద్రబాబు పాదయాత్ర శనివారంతో ముగియనుంది. దీంతో ముగింపు సభకు కార్యకర్తలు పెద్ద ఎత్తున విశాఖలో ఏర్పాట్లు చేస్తున్నారు. దాదాపు 250 మంది నేతలు కూర్చునే విధంగా భారీ స్టేజీని ఏర్పరుస్తున్నారు. ఈ ముగింపు సభకు రాష్ట్రం నలుమూలల నుంచి టీడీపీ కార్యకర్తలు, అభిమానులు పెద్ద ఎత్తున పాల్గొననున్నారు. ఇందులో భాగంగా చంద్రబాబు నాయుడు విజయస్థూపాన్ని(పైలాన్) ఆవిష్కరించనున్నారు. ముగింపు సభకు దాదాపు 5 లక్షల మంది రానున్నట్లు నిర్వాహకులు అంచనా వేస్తున్నారు. సభా ప్రాంగణంలో మహాత్మాగాంధీ, జ్యోతిరావు పూలే, అంబేద్కర్, ఎన్.టి. రామారావు, ఎర్రన్నాయుడు విగ్రహాలు ఏర్పాటు చేశారు. అంతే కాకుండా ఈ ముగింపు సభలోనే రాష్ట్రాన్ని ముందుకు తీసుకుపోవడానికి చేపట్టే పలు అభివృద్ధి కార్యక్రమాలను కూడా చంద్రబాబు వెల్లడించనున్నారు.