ఆసక్తికరమైన ‘టైటిల్’తో కొత్త సినిమా

Posted: 09/15/2015 12:31 PM IST

Avasarala srinivas new movie with interesting title

‘అష్టా చమ్మా’ సినిమాతో వెండితెరకు పరిచయమైన శ్రీనివాస్ అవసరాల.. తనదైన కామెడీ టైమింగ్‌తో అనతికాలంలోనే నటుడిగా మంచి గుర్తింపు తెచ్చుకున్నాడు. ఇతర కమెడియన్ల కంటే కాస్త డిఫరెంట్ స్టైల్ తో నవ్వు పుట్టించే క్యారెక్టర్ తో ఎంతో మంది అభిమానుల్ని సంపాదించాడు. కేవలం నటుడిగానే కాదు.. దర్శకత్వం వైపు అడుగులు వేసి ‘ఊహలు గుసగుసలాడే’ సినిమాతో తనలో దాగివున్న మరో టాలెంట్ ని నిరూపించుకున్నాడు. దీంతో ఈ నటుడికి సినిమాల్లో క్యారెక్టర్ ఆర్టిస్టుగా నటించే అవకశాలు రావడంతోపాటు మరో సినిమాకు దర్శకత్వం ఆఫర్ లభించింది.

‘ఊహలు గుసగుసలాడే’ సినిమా మంచి విజయం సాధించడంతో మరో సినిమా తీయాలని శ్రీనివాస్ అప్పుడే ఫిక్స్ అయ్యాడు. అందుకు సంబంధించిన కథ, ఇతర పనుల్లో నిమగ్నమయ్యాడు. ఇప్పుడు ఆ పని మొత్తం తుదిదశకు చేరుకోవడంతో తన తాజా చిత్రానికి సంబంధించిన వివరాలను తెలియజేశాడు. వారాహి సంస్థ నిర్మాణంలో రూపొందనున్న ఈ సినిమాను త్వరలోనే ప్రారంభించనున్న శ్రీనివాస్.. ఆ మూవీకి సంబంధించిన విశేషాలు వెల్లడించాడు. ఆ సినిమా స్టోరీ ఏంటంటే.. అచ్యుత రామారావు, ఆనంద్ వర్ధన్‌రావు అనబడే ఇద్దరు అన్నదమ్ములు వుంటారు. వారిరివుతోపాటు వారికి కూతురు వరుసైన జ్యోత్స్న అనే అమ్మాయి వారిద్దరితోనే వుంటుంది. ఈ ముగ్గురు జీవితం ఎలా గడుస్తుంది.. వారికి ఇబ్బందులు వస్తే వాటిని ఎలా ఎదుర్కొంటారు.. వంటి ఆసక్తికరమైన విషయాలతో తన కొత్త సినిమా తెరకెక్కనుందని శ్రీనివాస్ తెలిపాడు.

ఇక ఈ సినిమా టైటిల్ చాలా ఆసక్తికరంగా వుంటుందని పేర్కొన్నాడు. ఆ ముగ్గురు క్యారెక్టర్ల పేర్ల ద్వారానే సినిమా టైటిల్ ఉండనుందని ఓ హింట్ ఇచ్చాడు శ్రీనివాస్.. ఈ మూడు పేర్లూ కలిపితే వచ్చే ‘జ్యో అచ్యుత ఆనంద’ అనే ప్రఖ్యాత కీర్తనను సినిమా పేరుగా పెట్టనున్నామనే విషయాన్ని ఇన్‌డైరెక్ట్‌గా వెల్లడించాడు. సెప్టెంబర్ 17న వినాయక చవితి రోజు ప్రారంభం కానున్న ఈ సినిమాకు సంబంధించిన పూర్తి వివరాలను త్వరలోనే తెలియజేస్తామని దర్శకుడు శ్రీనివాస్ స్పష్టం చేశాడు.