బీజేపీ ఎన్నికల ప్రచారకర్తగా ప్రభాస్??

Posted: 05/16/2017 02:19 PM IST

రాజకీయాలకు, సినిమాలకు అనుబంధం ఇప్పటిది కాదు. ఎన్నో ఏళ్లుగా నడుస్తూ వస్తోంది. కాస్త గుర్తింపు రాగానే వాళ్ల క్రేజ్ ను ఉపయోగించుకొని ఓట్లు దండుకోవాలని పొలిటికల్ పార్టీలు ప్రయత్నిస్తూ ఉంటాయి. బాహుబలి తో ప్రభాస్ కు వచ్చిన ఇమేజ్ ని క్యాష్ చేసుకోవాలని ఓ జాతీయ పార్టీ భావిస్తున్నట్టు ఇప్పుడు వార్తలు షికార్లు చేస్తున్నాయి. తద్వారా 2019 ఎన్నికల్లో లాభపడదామన్నది వారి ఆలోచనగా తెలుస్తోంది.

ప్రభాస్ పెదనాన్న కృష్ణంరాజు 1990వ దశకంలో భారతీయ జనతా పార్టీలో చేరి 12,13 లోక్ సభలకు కాకినాడ, నరసాపురం నియోజకవర్గాల నుంచి ఎంపీగా విజయం సాధించిన సంగతి తెలిసిందే. ఆపై 1999 నుంచి 2004 వరకూ వాజ్ పేయి మంత్రి వర్గంలో విదేశాంగ శాఖ సహాయమంత్రిగానూ సేవలందించారు. అనంతరం 2009లో హీరో చిరంజీవి ప్రారంభించిన ప్రజారాజ్యం పార్టీలో చేరి రాజమండ్రి నుంచి ఎంపీ స్థానానికి పోటీ చేసి ఓటమి పాలయ్యారు. అనంతరం క్రియాశీల రాజకీయాలకు దూరంగా ఉంటున్న ఆయన ఇటీవలి కాలంలో తిరిగి బీజేపీకి దగ్గరవుతూ వస్తున్నాడు.

ఆ మధ్య బాహుబలి పస్ట్ పార్ట్ హిట్ తర్వాత కృష్ణంరాజు ప్రభాస్ ను వెంట పెట్టుకుని మరీ వెళ్లి ప్రధాని మోదీని కలిసి వచ్చిన విషయం తెలిసిందే. ఇప్పుడు రెండో పార్ట్ తో ప్రభాస్ రేంజ్ మరింత పెరిగిపోయింది. ఈ దశలో ఎన్నికల్లో ప్రభాస్ తో ఎన్నికల ప్రచారం చేయిస్తే, గెలుపు ఖాయమవుతుందన్న ధీమాలో పార్టీ ఉందంట. ప్రభాస్ సినిమాల షూటింగులకు ఇబ్బంది కలిగించకుండా ప్రచార షెడ్యూల్ ను ఏర్పాటు చేసుకుంటామని హామీ కూడా ఇచ్చినట్టు తెలుస్తోంది. 2014 ఎన్నికల్లో పవన్ క్రేజ్ ను కేవలం తెలుగు రాష్ట్రాలకే పరిమితం చేసిన బీజేపీ, ప్రభాస్ ను మాత్రం నేషనల్ వైడ్ గా తిప్పేయాలని ఫిక్సయినట్లు సమాచారం.

అయితే, తనకు రాజకీయాలంటే అస్సలు ఇష్టం లేదని, వాటిని అస్సలు సరితూగనని స్వయంగా ప్రభాస్ ఆమధ్యే తేల్చి చెప్పాడు. ఆ లెక్కన ఈ వార్త ఉత్త గాలి వార్తేనని కొందరు అంటుంటే.. ఇప్పటికే కృష్ణంరాజుతో బీజేపీ గ్రౌండ్ వర్క్ ప్రారంభించేసిందని ఇంకొందరు అంటున్నారు. ఏది ఏమైనా మొహమాటస్తుడు, మాటల్లో కాస్త తడబడే డార్లింగ్ ను రాజకీయ కోణంలో వాడుకోవాలనుకోవటం వర్కువట్ అయ్యే పని కాదని పలువురు చెబుతున్నారు.