కత్తి రీమేక్ కు యంగ్ టైగర్ గ్రీన్ సిగ్నల్

Posted: 08/05/2015 04:37 PM IST

తమిళంలో ఇలయథలపతి విజయ్, సమంత జంటగా నటించిన ‘కత్తి’ సినిమా బ్లాక్ బస్టర్ హిట్టయ్యింది. ఈ చిత్రాన్ని తెలుగులోకి రీమేక్ చేయడానికి గతకొద్ది కాలంగా ప్రయత్నాలు జరుగుతునే వున్నాయి. ప్రముఖ దర్శకుడు మురుగదాస్ దర్శకత్వంలో తెరకెక్కిన ఈ చిత్రం భారీ కలెక్షన్ల వర్షం కురిపించింది.

అలాంటి ఈ చిత్రాన్ని తెలుగులో రీమేక్ చేయాలనుకున్నారు. ఈ రీమేక్ కోసం పవన్ కళ్యాణ్, మహేష్ వంటి పలు స్టార్ హీరోలను సంప్రదించారు. కానీ ఈ రీమేక్ పై ఎవరూ కూడా ఆసక్తి చూపించలేదు. దీంతో ఈ చిత్రాన్ని నేరుగా డబ్బింగ్ చేసి విడుదల చేయాలని చిత్ర యూనిట్ భావించారు. కానీ తాజాగా ఈ చిత్రాన్ని రీమేక్ చేయడానికి సన్నాహాలు చేస్తున్నట్లుగా తెలిసింది.

తాజా సమాచారం ప్రకారం ఈ రీమేక్ కు యంగ్ టైగర్ ఎన్టీఆర్ గ్రీన్ సిగ్నల్ ఇచ్చినట్లుగా తెలిసింది. ఈ రీమేక్ ను ప్రముఖ దర్శకుడు గోపిచంద్ మలినేని దర్శకత్వంలో తెరకెక్కనుందని తెలిసింది. ప్రస్తుతం తెలుగు నేటివిటీకి సంబంధించి కొన్ని మార్పులు, చేర్పులు చేస్తున్నట్లుగా తెలిసింది.

ప్రస్తుతం సుకుమార్ దర్శకత్వంలో తెరకెక్కుతున్న సినిమాతో ఎన్టీఆర్ బిజీగా వున్నాడు. ఈ సినిమా పూర్తయిన తర్వాత ‘కత్తి’ రీమేక్ లో ఎన్టీఆర్ నటించనున్నాడని తెలిసింది. త్వరలోనే అన్ని వివరాలు అధికారికంగా తెలియనున్నాయి.