టాలీవుడ్ యంగ్ హీరోను అరెస్టు చేసిన ఈడీ అధికారులు

Posted: 02/15/2021 04:59 PM IST

Actor who purchased vijay mallya s goa villa arrested in omkar realty case

తెలుగు ప్రేక్షకులకు 'ఒరేయ్ పండు', 'మౌనమేలనోయి', 'జాక్ పాట్' తదితర చిత్రాలతో సుపరిచితుడైన నటుడు, నిర్మాత, వ్యాపారవేత్త సచిన్ జోషిని ఎన్ ఫోర్స్ మెంట్ డైరెక్టరేట్ అధికారులు అరెస్ట్ చేశారు. అటు బాలీవుడ్ ప్రపంచంతో పాటు ఇటు టాలీవుడ్ కు కూడా పరిచయమున్న ఈ నటుడు.. కింగ్ ఫిషర్ అధినేత, ఆర్థిక నేరస్థుడు విజయ్ మాల్యాకు చెందిన సకల వసుతులతో కూడిన గోవా విల్లాను.. బ్యాంకులు విజయ్ మాల్యా అస్తుల వేలం వేయడంతో ఆయన కొనుగోలు చేశారు.

అప్పట్లోనే ఆయన వార్తల్లో నిలువుగా.. తాజాగా మరోమారు ఆయన తన అరెస్టుతో వార్తల్లో నిలిచారు. ప్రస్తుతం ఈడీ విచారిస్తున్న ఓమ్ కార్ రియల్టర్స్ కేసులో జేఎం జోషి గ్రూప్ ప్రమేయాన్ని నిర్ధారించుకున్న ఈడీ అధికారులు, తదుపరి విచారణ కోసం సచిన్ జోషిని అరెస్ట్ చేశారని తెలుస్తోంది. ఓమ్ కార్ గ్రూప్ ప్రమోటర్లలో సచిన్ జోషి కూడా ఉన్నాడు. దాదాపు 100 కోట్ల రూపాయల నిధులను వీరు కాజేశారని ఆరోపణలు ఉన్నాయి.

అంతకుముందు దాదాపు 18 గంటల పాటు సచిన్ జోషిని విచారించిన ఈడీ అధికారులు, ఆపై అరెస్ట్ చేస్తున్నట్టు స్పష్టం చేశారు. కాగా, గోవాలో విజయ్ మాల్యా సొంతమైన కింగ్ ఫిషర్ విల్లాను గతంలో జోషి కొనుగోలు చేశాడు. దేశవ్యాప్తంగా రెస్టారెంట్ లు, క్లబ్ లను కలిగివున్న ప్లేబాయ్ ఫ్రాంచైజీని కూడా నిర్వహిస్తున్నాడు.