వెధవలకెప్పుడూ మంచి పెళ్లాలే దొరుకుతారా..?

Posted: 02/14/2019 08:35 PM IST

Majili teaser out samantha and naga chaitanya promise fans an intense love story

అక్కినేని నాగచైతన్య, సమంత కలిసి నటిస్తున్న తాజా చిత్రం ‘మజిలీ’. ‘దేర్ ఈజ్ లవ్దేర్ ఈజ్ పెయిన్’ అనేది క్యాప్షన్. పెళ్లయిన తర్వాత వీరిద్దరి కాంబినేషన్లో వస్తున్న తొలి చిత్రం కావడంతో ‘మజిలీ’పై భారీ అంచనాలున్నాయి. ఇప్పటికే విడుదలైన ఫస్ట్ లుక్, సెకండ్ లుక్‌కు అద్భుతమైన రెస్పాన్స్ వచ్చింది. లవర్స్ డే సందర్భంగా గురువారం ఈ చిత్ర టీజర్ విడుదల చేశారు.

‘నీకో సంవత్సరం టైమ్ ఇస్తున్నాను. ఈలోగా సచినే అవుతావో.. సోంబేరి అవుతావో నీ ఇష్టం’ అంటూ రావు రమేష్ చెబుతున్న డైలాగ్‌తో టీజర్ స్టార్ అవుతోంది. ఒక్కసారి పోతే తిరిగి రాదురా.. అది వస్తువైనా, మనిషైనా, నువ్వు నా రూమ్‌లోకి రాగలవేమో గానీ.. నా మనసులోకి మాత్రం ఎప్పటికీ రాలేవు, వెధవలకెప్పుడూ మంచి పెళ్లాలే దొరుకుతారని నువ్వే ప్రూవ్ చేశావ్’ అనే డైలాగులు ఆకట్టుకుంటున్నాయి.

టీజర్ చూస్తుంటే ఈ సినిమాలో నాగచైతన్యకు లవ్ ఫెయిల్యూర్ అయినట్లు అనిపిస్తోంది. ఇష్టం లేని భార్యతో కాపురం చేసే వ్యక్తిగా, భర్త పట్టించుకోకపోయినా అతడిపై సముద్రమంత ప్రేమ చూపించే అమాయక భార్యగా సమంత బాగా నటించారు. మరో హీరోయిన్ దివ్యాంశా కౌశిక్‌తో నాగచైతన్య లిప్‌లాక్ టీజర్‌కే హైలెట్. క్రికెటర్‌గా చై చాలా యంగ్‌గా కనిపిస్తున్నారు.

‘నిన్నుకోరి’ లాంటి ఎమోషనల్ ఎంటర్టైనర్ తర్వాత శివ నిర్వాణ తెరకెక్కిస్తున్న చిత్రం ‘మజిలీ’. చివరి షెడ్యూల్ ప్రస్తుతం హైదరాబాద్ లో జరుగుతుంది. రావు ర‌మేష్, పోసాని కృష్ణమురళి, సుబ్బరాజు కీల‌క‌పాత్రల్లో న‌టిస్తున్నారు. షైన్ స్క్రీన్ బ్యాన‌ర్‌పై సాహు గ‌ర‌పాటి, హ‌రీష్ పెద్ది ఈ సినిమా నిర్మిస్తున్నారు. గోపీ సుంద‌ర్ సంగీతం అందిస్తున్నారు. అన్ని కార్యక్రమాలు పూర్తిచేసుకుని ఏప్రిల్ 5న ప్రేక్షకులను అలరించేందుకు వస్తోంది ‘మజిలీ’.