అదర చుంబనానికి 'పేపర్ బాయ్' కొత్త బాష్యం..

Posted: 08/18/2018 06:28 PM IST

‘ప్రేమంటే ఆక్సిజన్‌ లాంటిది. అది కనిపించదు.. కానీ, బతికిస్తుంది’ అంటున్నాడు యువ కథానాయకుడు సంతోష్‌ శోభన్‌. ఆయన నటిస్తున్న తాజా చిత్రం ‘పేపర్ బాయ్’. రియా సుమన్‌, తన్య హోప్‌ కథానాయికలు. జయ శంకర్‌ దర్శకుడు. సంపత్‌ నంది టీమ్‌ వర్స్క్‌ పతాకంపై సంపత్‌ నంది ఈ సినిమాను నిర్మిస్తున్నారు. ఇటీవల విడుదలైన ఈ సినిమా టీజర్‌ ఆకట్టుకుంది.

శనివారం ప్రసాద్‌ ల్యాబ్‌లో ఈ సినిమా ట్రైలర్ ను విడుదల చేశారు. పుస్తకాలతో కథానాయకుడు, నాయిక ప్రేమ మొదలైనట్లు ఈ ప్రచార చిత్రంలో చూపించారు. ‘ధరణి.. నేను చదివిని మొట్ట మొదటి కవిత.. ఈ మూడు అక్షరాలు. నాకు పరిచయమైంది పుస్తకాలు, దగ్గరైంది అక్షరాలు’ అంటూ హీరో తన జీవితాన్ని పరిచయం చేశారు. ‘ఈ ప్రపంచంలో ఏ ఇద్దరి ప్రపంచం ఒక్కలా ఉండదు అంటారు. కానీ, ఆ అక్షరాలు చూశాక మా ఇద్దరి ప్రపంచం ఒక్కటే అనిపించింది’ అని కథానాయిక తన మనసులో మాట చెబుతున్నారు.

‘ముద్దు పెట్టుకోవడం అంటే పెదాలు మార్చుకోవడం కాదు.. ఊపిరి మార్చుకోవడం’ అని హీరో భావోద్వేగంతో వివరిస్తూ కనిపించారు. ‘రేపటి నుంచి నీ కూతురు, వాడు సైకిల్‌ ఎక్కి పేపర్‌, పేపర్‌ అంటూ పేపర్‌ అమ్ముకోవాలి’ అంటూ పోసాని కోపంతో ఊగిపోతున్నారు. సంపన్న కుటుంబానికి చెందిన కథానాయికకి, పేద యువకుడైన కథానాయకుడికి మధ్య చిగురించిన ప్రేమ నేపథ్యంలో ఈ చిత్రాన్ని రూపొందించినట్లు తెలుస్తోంది. సెప్టెంబరు 7న ఈ చిత్రం ప్రేక్షకుల ముందుకు రాబోతోంది.