వంద కోట్ల క్లబ్ లోకి చరణ్-సుకుమార్ల రంగస్థలం..

Posted: 04/03/2018 04:53 PM IST

మెగా పవర్ స్టార్ రాంచరణ్ తేజ్ నట విశ్వరూపానికి ప్రతీకగా నిలిచిన చిత్రం రంగస్థలం.. సుకుమార్ దర్శకత్వంలో రూపోందిన ఈ చిత్రం మంచి హిట్ టాక్ సొంత చేసుకుని ప్రపంచవ్యాప్తంగా వున్న తెలుగు ప్రజల అభిమానుల అదరణను పోందుతూ.. చిత్రం విడుదలైన నాలుగు రోజుల వ్యవధిలోనే వందకోట్ల క్లబ్ లో చేరిపోయింది. ఇక 150 కోట్ల రికార్డును దాటివేసేందుకు రెడీ అవుతుంది. బాహుబలి తరువాత అంతటి వేగంగా కలెక్షన్లు రాబట్టిన చిత్రంగా టాలీవుడ్ లో రికార్డులను అందుకుంది. ఈ చిత్రం విడుదలైన మొదటి రోజు నుంచే రికార్డులు క్రియేట్ చేస్తూ దూసుకెళ్తున్న విషయం తెలిసిందే.

ఇప్పటికే మంచి వసూళ్లను సాధిస్తున్న రంగస్థలం మున్ముందు మరిన్ని రికార్డ్ లు తిరగరాయటం ఖాయమని మెగా పవర్ స్టార్ అభిమానులు ధీమా వ్యక్తం చేశారు. రామ్ చరణ్, సమంత హీరో, హీరోయిన్లుగా నటించిన ఈ చిత్రం తొలి నాలుగు రోజుల్లోనే ప్ర‌పంచ వ్యాప్తంగా 100 కోట్ల క‌లెక్ష‌న్స్ సాధించింది. తెలుగు రాష్ట్రాలలో తొలి నాలుగు రోజుల్లో రూ. 43.78 కోట్ల షేర్ ను రాబట్టడగా, ఇక ఓవర్ సీస్ లో ఇప్పటికే ఈ సినిమా 2.45 మిలియన్ డాలర్లను రాబట్టేసింది. ఇక అటు ఆస్ట్రేలియాలో కూడా రంగ‌స్థ‌లం హ‌వా కొన‌సాగుతుంది.

ఈ ఏడాది విడుద‌లైన భార‌తీయ సినిమాలలో ప‌ద్మావ‌త్ త‌ర్వాత ఆస్ట్రేలియాలో ఎక్కువ వ‌సూళ్ళు రాబ‌ట్టిన చిత్రం రంగ‌స్థ‌లం అని ప్రముఖ సినీ విశ్లేషకుడు తరణ్ ఆదర్శ్ ట్వీట్ చేశాడు. నాన్ బాహుబలి చిత్రాలలో ఇప్పుడు రంగస్థలమే టాప్ కలెక్షన్లను రాబట్టడంతో నెంబర్ వన్ గా నిలిచిందని విశ్లేషకులు పేర్కొంటున్నారు. ఫుల్ రన్ లో ఈ సినిమా కొత్త రికార్డులను సృష్టించడం ఖాయమని తెలుస్తోంది. 1980ల కాలంలో జరిగే కథగా తెరకెక్కిన ఈ సినిమాలో చరణ్‌.. చిట్టిబాబు గా అద్భుతమైన నటనతో ఆకట్టుకున్నాడు. చరణ్ కెరీర్ లోనే రంగస్థలం బిగ్గెస్ట్ హిట్ గా నిలిచింది. దర్శకుడిగా తన ప్రతిభా పాటవాలకు కొలమానంగా ఈ సినిమాను సెట్ చేశాడు.