చైనాలో అమీర్ దంగల్ అరుదైన రికార్డు

Posted: 06/02/2017 05:58 PM IST

Aamir khan s dangal becomes first indian film to earn rs 1 000cr in china

ప్రపంచ వ్యాప్తంగా ప్రేక్షకులను అలరిస్తూ విడుదలై ఐదు మాసాలు కావస్తున్న ఇంకా కలెక్షన్లతో దూసుకుపోతున్న భారతీయ చిత్రం అమీర్ ఖాన్ 'దంగల్'. సినీ విమర్శకుల నుంచి సైతం ప్రశంసలు అందుకుంటూ విజయవిహారం చేస్తున్న ఈ చిత్రం తాజాగా చైనాలో అరుదైన రికార్డును అందుకుంది. ఇప్పటి వరకు చైనాలో విడుదలైన భారతీయ చిత్రాలలో ఇంతకు ముందు ఏ చిత్రమూ రాబట్టని కలెక్షన్లను ఈ చిత్రం రాబట్టుకుంది. చైనాలో వెయ్యి కోట్ల రూపాయల గ్రాస్ కలెక్షన్లను సాధించిన తొలిచిత్రంగా దంగల్ రికార్డును నమోదు చేసుకుంది.

ఒక్క చైనాలోనే ఈ సినిమా వెయ్యి కోట్ల మార్క్ ను క్రాస్ చేసి కలెక్షన్లలో దూసుకుపోతుంది. నిన్నటి వసూళ్లతో కలుపుకుంటే ఈ సినిమా అక్కడ 1021 కోట్లను రాబట్టింది. ఇంతవరకూ హాలీవుడ్ సినిమాలు మాత్రమే ఈ స్థాయిలో అక్కడ వసూలు చేశాయి. హాలీవుడ్ కు చెందని చిత్రాలలో దంగల్ మాత్రమే చైనాలో ఈ స్థాయి వసూళ్లను రాబట్టిందని సినీ విశ్లేషకుల అభిప్రాయం. చైనాలో ఈ స్థాయి వసూళ్లు ఇప్పట్లో మరో భారతీయ సినిమాకి సాధ్యం కాకపోవచ్చనే అభిప్రాయాలు వ్యక్తమవుతున్నాయి. ఎమోషన్స్ తో కూడిన ఈ కంటెంట్ అక్కడి వారికి బాగా కనెక్ట్ కావడం వలన .. డ్రాగన్ బోట్ ఫెస్టివల్ సీజన్ కలిసి రావడం వలన ఈ స్థాయి వసూళ్లు సాధ్యమయ్యాయని చెప్పుకుంటున్నారు.