రాబిన్ హుడ్ ఎంట్రీకి సర్వం సిద్ధం

Posted: 06/10/2016 10:47 AM IST

‘బెంగాల్ టైగర్’ విడుదలై చాలా కాలం అవుతున్న మాస్ మహారాజ్ రవితేజ తన కొత్త సినిమాను ఇంకా ప్రారంభించలేదు. దిల్ రాజు - రవితేజల కాంబినేషన్లో ‘ఎవడో ఒకడు’ పేరుతో ఓ సినిమా రూపొందనుందని గతంలో వార్తలొచ్చాయి. కానీ ఈ ప్రాజెక్ట్ సెట్స్ పైకి వెళ్లకముందే కొన్ని అనివార్య కారణాల వల్ల ఆగిపోయింది. ఆ తర్వాత ‘రాబిన్ హుడ్’ పేరుతో రవితేజ ఓ సినిమా చేయబోతున్నాడని వార్తలొచ్చాయి. కానీ ఆ సినిమా కూడా సెట్స్ పైకి ఇంకా వెళ్లలేదు.

అయితే ‘బెంగాల్ టైగర్’ తర్వాత తాను చేయబోయే సినిమా ‘రాబిన్ హుడ్’ అని ఇటీవలే రవితేజ ఓ కార్యక్రమంలో భాగంగా చెప్పుకొచ్చాడు. ఈ సినిమాకు సంబంధించిన స్క్రిప్ట్ పనులు పూర్తయ్యాయని తెలిసింది. ఈ సినిమాతో చక్రి దర్శకుడిగా పరిచయం కాబోతున్నాడు. రవితేజతో మరోసారి రాశిఖన్నా రొమాన్స్ చేయనుంది. కమర్షియల్ మాస్ మసాలా యాక్షన్ ఎంటర్ టైనర్ గా ఈ సినిమా తెరకెక్కనుంది.

తాజా సమాచారం ఈ సినిమాను జులై నెలలో సెట్స్ పైకి తీసుకెళ్లనున్నారని తెలిసింది. డివివి దానయ్య భారీ బడ్జెట్ తో నిర్మించనున్నారు. ఈ సినిమాకు సంబంధించిన మరిన్ని వివరాలను త్వరలోనే అధికారికంగా ప్రకటించనున్నారు.