కెరీర్ గ్రాఫ్ హైప్ కోసం చెర్రీ కొత్త ఆలోచన!

Posted: 10/22/2015 02:19 PM IST

ఇండస్ట్రీలో తమకంటూ ప్రత్యేక గుర్తింపు సాధించాలంటే కేవలం నటన, ఫాలోయింగ్ వుంటే సరిపోదు... సరైనా కథాంశంతో కూడిన చిత్రాలు చేస్తూ ప్రేక్షకుల ఆదరణ పొందితేనే ఓ ఇమేజ్ క్రియేట్ చేసుకోవచ్చు. చిన్నాపెద్దా అని తేడా లేకుండా ఈ సూత్రం ప్రతిఒక్కరికి వర్తిస్తుంది. ఈ విషయాన్ని కాస్త ఆలస్యంగా పసిగట్టిన మెగాపవర్ స్టార్ రామ్ చరణ్ తేజ్.. ఆ దిశగా పావులు కదుపుతున్నట్లు తెలుస్తోంది. నిన్నటిదాకా తన బ్రాండ్ ఇమేజ్‌తో వరుస సినిమాలు చేసుకుంటూపోయిన చెర్రీ.. ప్రస్తుతం టాలీవుడ్ వాతావరణ పరిస్థితులకు అనుగుణంగా తననితాను మలుచుకుంటున్నట్లు సమాచారం.

ఇటీవల ‘బ్రూస్‌లీ’ సినిమాతో ప్రేక్షకుల ముందుకొచ్చిన చెర్రీకి కాస్త నిరాశే మిగిలింది. ఆ చిత్రం భారీ విజయం సాధిస్తుందని మూవీ యూనిట్‌తోపాటు చెర్రీ కూడా ఎన్నో ఆశలు పెట్టుకున్నాడు కానీ.. యావరేజ్‌తోనే సరిపెట్టుకోవాల్సి వచ్చింది. ముఖ్యంగా.. ఈ సినిమా కథ అంతగా ఇంప్రెసివ్‌గా లేదని, ప్రేక్షకుల్ని ఎంటర్టైన్ చేయలేదని విశ్లేషకులు తేల్చి పారేశారు. అందుకేనేమో.. చెర్రీ ఇప్పుడు స్ర్కిప్ట్ రైటింగ్‌పై దృష్టి పెడుతున్నాడు.  సినిమా స్క్రిప్టుపై పట్టు తెచ్చుకునే క్రమంలో భాగంగా త్వరలో ఓ షార్ట్ టర్మ్ కోర్సు చేయడానికి రెడీ అవుతున్నాడు. నవంబర్, డిసెంబర్ నెలల్లో ఈ స్క్రిప్ట్ రైటింగ్ కోర్సుకి హాజరవుతాడట. ఈ విషయాన్ని స్వయంగా తనే వెల్లడించాడు కూడా. అయితే, ఏ దేశంలో ట్రైనింగ్ తీసుకుంటాడన్నది మాత్రం వెల్లడించలేదు. మంచి కథలను ఎంచుకోవడానికి ఈ కోర్సు తనకి ఉపయోగపడుతుందని చరణ్ చెబుతున్నాడు.

ఇదిలావుండగా.. తమిళంలో భారీ విజయం సాధించిన ‘తని ఒరువన్’ చిత్రాన్ని తెలుగులో చెర్రీ హీరోగా రీమేక్ చేయనున్న విషయం తెలిసిందే! ఈ సినిమా త్వరలోనే సెట్స్ మీదకు వెళుతుందని అంతా భావించారు. కానీ.. ఆ చిత్రం మొదలవడానికి ఇంకా సమయం పడుతుందని తెలిసింది. ఈ ఖాళీ సమయంలో చెర్రీ తన ఫ్యామిలీతో కలసి హాలిడే ట్రిప్ కోసం త్వరలో లండన్ వెళుతున్నాడు. ఆ ట్రిప్ అయిన వెంటనే స్ర్కిప్ట్ కోర్సులో చేరి, ఆ తర్వాత తన తదుపరి చిత్రాలపై దృష్టి సారిస్తాడని చెప్పుకుంటున్నారు.