ప్రియాంకను ఆశ్చర్యానికి గురిచేసిందెవరు..?

Posted: 07/19/2015 02:44 PM IST

Priyanka chopra turns 33 gets birthday surprise from mother

బాలీవుడ్ బ్యూటీ ప్రియాంక చోప్రాను నిన్న ఒకరు ఆశ్చారానికి గురిచేశారట. అమె ఎవరో తెలుసా.. స్వయంగా ప్రియాంక తల్లే. అదేంటి ప్రియాంకను అమె తల్లి ఆశ్చర్యానికి గురిచేయడమేంటనేగా మీ సందేహం. అక్కడికే వస్తున్నాం. దీపముండగానే ఇల్లు చక్కబెట్టుకోవడంపై దృష్టిపెట్టిన ప్రియాంక అటు అడ్వరైజ్ మెంట్లు, ఇటు సినిమాలు, ఇలా అన్నింటిని కరెక్టుగా షెడ్యూల్ చేసుకుని క్షణం తీరిక లేకుండా బిజిబిజీగా వుండటంతో తన జన్మదినాన్ని కూడా సరిగా జరుపుకోకుండా వుందట. అయితే నిన్ననే (శనివారం) 33వ వడిలో అడుగుపెట్టిన ఈ ముద్దుగుమ్మను మాత్రం ఈ సందర్భంగా అమె తల్లి సంభ్రమాశ్చర్యాలకు గురిచేసిందట. అదెలా అంటారా..?

ప్రియాంక జన్మ దినోత్సవాన్ని పురస్కరించుకుని అమెకు తెలియకుండానే అమె తల్లి బర్త్ డే పార్టీని ఏర్పాటు చేసి ఆశ్చర్యానికి గురి చేసిందట. ఈ విషయాన్ని స్వయంగా ప్రియాంక ట్విట్టర్‌లో తెలిపింది. బాజీరావ్ మస్తానీ షూటింగ్‌తో పాటు గాంగాజల్ 2, అమెరికన్ టీవీ షో క్వాంటికో తో ఈ అమ్మడు క్షణం తీరిక లేకుండా ఉంటోంది. స్నేహితులంతా వచ్చి తనకు శుభాకాంక్షలు తెలపడంతో విస్తుపోయానన్నారు. ఏదేమైనా తనకు అమితానందంగా ఉందని, మిత్రులందరికి ధన్యవాదాలు తెలుపుతున్నానని ప్రియాంక చెప్పింది. ఈ పార్టీకి ప్రియంక కజిన్ పరిణీతి చోప్రా, సంజయ్ లీలా భన్సాలీ, రణ్‌వీర్ సింగ్, రితేశ్ దేశ్‌ముఖ్, జెనీలియా తదితర బాలీవుడ్ ప్రముఖులు హాజరయ్యారు.

జి. మనోహర్