Posted: 04/26/2012 05:40 PM IST

              అధినాయకుడు సినిమా ఏ మహూర్తాన ప్రారంభించారో ఏమో అన్నీ అవాంతరాలే..అడ్డంకులే.  మూలిగే నక్క మీద తాటికాయ పడ్డట్టుగా... అసలే ఆర్ధిక ఇబ్బందుల్లో వున్న 'అధినాయకుడు' సినిమా తాజాగా మరో చిక్కుల్లో పడింది. ప్రముఖ అవుట్ డోర్ సినీ యూనిట్ సంస్థ ఆనంద్ సినీ సర్వీసెస్ ఈ సినిమా నిర్మాతపై కోర్టుకెక్కింది.
              సదరు నిర్మాత తమకు 51 లక్షలు బాకీ పడ్డారనీ, అది పూర్తిగా చెల్లించే వరకు సినిమా విడుదలను నిలుపుదల చేయాలనీ కోరుతూ ఆనంద్ సినీ సర్వీసెస్ కోర్టులో పిటిషన్ వేసింది. కోర్టు బయట పరిష్కారం లభించకపోవడంతో ఆ సంస్థ ఇక గత్యంతరం లేని పరిస్థితుల్లో న్యాయపరమైన చర్యలకు ఉపక్రమించిందని అంటున్నారు. దీంతో ఈ వ్యవహారం మరింత ముదిరిందనే చెప్పచ్చు. ఇప్పటికే పలు ఇబ్బందులతో విడుదల పరంగా వాయిదా పడుతూ వచ్చిన ఈ చిత్రం, ఇప్పుడు మరింతగా కష్టాలలో కూరుకుపోయిందని అంటున్నారు. తాను ఎన్నో ఆశలు పెట్టుకున్న ఈ సినిమా, ఇలా రకరకాల కారణాలతో విడుదలకు నోచుకోకపోవడం బాలకృష్ణకు మనస్తాపాన్ని కలిగించటమే కాదు నందమూరి అభిమానులకు ఇది కంటగింపుగా మారింది. ఇక ఈ సినిమా ఏదోరకంగా రిలీజై సూపర్ హిట్ అయితే గాని నిర్మాత కష్టాలు తీరవు. ఒకవేళ మూవీ అటు ఇటు అయితే ఇక అంతే సంగతులు.దేవుడే దిక్కు.

...avnk