ఓయూలో మళ్లీ ఉద్రిక్తతలు

Posted: 11/17/2014 11:32 AM IST

ఉద్యమాల గడ్డ ఉస్మానియా యునివర్సిటీలో మరోసారి ఉద్రిక్త పరిస్థితులు నెలకొన్నాయి. నిరుద్యోగ, ఓయూ విద్యార్థి జేఏసీ సంయుక్తంగా ఛలో అసెంబ్లీ కార్యక్రమంకు పిలుపునిచ్చాయి. అసెంబ్లీ సమావేశాలు జరుగుతున్న తరుణంలో ఈ కార్యక్రమం చేపట్టడంతో పోలిసులు అప్రమత్తమయ్యారు. క్యాంపస్ పరిసర ప్రాంతాలు, బయటకు దారితీసే గేట్ల వద్ద భారీగా బలగాలను మోహరించారు. ఎన్సీసీ గేటు వద్ద పికెట్ ఏర్పాటు చేశారు.

తార్నాక, ఓయూ పీఎస్, మానికేశ్వర్ నగర్ ఇతర ప్రవేశద్వారాల వద్ద బలగాలను మోహరించారు. విద్యార్థుల ఆందోళనల నేపథ్యంలో క్యాంపస్ లోపలికి వాహనాలు అనుమతించటంలేదు. కాంట్రాక్టు ఉద్యోగులను రెగ్యులరైజ్ చేస్తూ, సీఎం తమకు అన్యాయం చేస్తన్నాడని విద్యార్థులు ఆరోపిస్తున్నారు. ఈ నేపథ్యంలోనే ప్రభుత్వ వైఖరికి నిరసనగా నిరుద్యోగ జేఏసీ అసెంబ్లీ ముట్టడికి పిలుపునిచ్చింది. దీంతో అవాంఛనీయ ఘటనలు జరగకుండా ముందు జాగ్రత్త చర్యలు చేపట్టినట్టు పోలీసులు తెలిపారు.

కార్తిక్