బెంగళూరులో మరో ఆరేళ్ల చిన్నారిపై అత్యాచార ఘటన..

Posted: 10/31/2014 08:42 PM IST

కర్ణాటక రాజధాని బెంగళూరులోని మరో దారుణం జరిగింది. ఇంటర్నేషనల్ పాఠశాలలో విద్యార్థినిపై ఆ స్కూలు అటెండర్ అత్యాచారం జరిపిన ఘటనను మరువక ముందే మరో ఘటన వెలుగుచూసింది. ఓ స్కూల్లో ఆరేళ్ల బాలికపై ఆ పాఠశాల ఉపాద్యాయుడే లైంగిక దాడికి పాల్పడ్డాడు. గడిచిన మూడు నెలల్లో ఈ తరహా కేసులు ఐదు చోటుచేసుకోవడంపై విద్యార్థుల తల్లిదండ్రులు ఆందోళన వ్యక్తం చేస్తున్నారు. పాఠశాలలకు పంపినా తమ పిల్లలు క్షేమంగా ఇళ్లకు తిరిగి వస్తారా.? అంటూ భయాందోళన చెందుతున్నారు. చిన్నారిపై లైంగిక వేధింపులకు పాల్పడిన ఉపాధ్యాయుడిని పోలీసులు అరెస్టు చేశారు. గత మంగళ, బుధ వారాల్లో రెండుసార్లు ఆ బాలికపై లైంగిక దాడికి పాల్పడినట్లు సదరు ఉపాధ్యాయుడు అంగీకరించాడని బెంగళూరు అదనపు పోలీసు కమిషన్ (శాంతిభద్రతలు) అలోక్ కుమార్ తెలిపారు.

స్కూలు నుంచి ఇంటికి వెళ్లిన బాలిక తనకు బాగా నొప్పిగా ఉందని చెప్పడంతో వైద్యుడి వద్దకు తీసుకెళ్లగా, ఆమెపై లైంగిక దాడి జరిగినట్లు ఆ వైద్యుడు చెప్పారు. దీంతో గురువారం పోలీసులు అత్యాచారం కేసు నమోదు చేశారు. నిందితుడిని అరెస్టు చేశామని, కేసు నమోదు చేశామని ముఖ్యమంత్రి సిద్దరామయ్య తెలిపారు. ఎక్కువగా ప్రైవేటు పాఠశాలల్లోనే ఈ తరహా సంఘటనలు జరుగుతున్నాయని, దాంతో ప్రైవేటు పాఠశాలల యాజమాన్యాలకు ఓ సర్క్యులర్ పంపామని ఆయన చెప్పారు. ఉపాధ్యాయులు, అటెండర్లు సహా టీచింగ్, నాన్ టీచింగ్ స్టాఫ్ నియామాలను చేపడుతున్నప్పడు.. పాఠశాల యాజమాన్యాలు ముందు వారి కుటుంబ నేపథ్యాన్ని, నేర ప్రవృత్తిని పరిగణలోకి తీసుకోవాలని సిద్దిరామయ్య సూచించారు.

జి.మనోహర్