సుప్రీంకోర్టులో జయలలిత బెయిల్ పిటిషన్!

Posted: 10/07/2014 07:51 PM IST

Jayalalitha to submit bail petition in supreme court

ఆదాయానికి మించి ఎక్కువ ఆస్తులు వున్నాయనే (అక్రమాస్తులు) కేసులో తమిళనాడు మాజీ ముఖ్యమంత్రి జయలలితకు బెంగుళూరు సిబిఐ ప్రత్యేక కోర్టు ఆమెకు నాలుగేళ్ల జైలుశిక్ష, వందకోట్ల జరిమానాతోపాటు ఆరేళ్ల అనర్హత వేటును వేసిన సంగతి తెలిసిందే! ఈ నేపథ్యంలోనే జయమ్మ తనకు బెయిలు మంజూరు చేయాల్సిందిగా కర్ణాటక హైకోర్టులో పిటీషన్ ను కూడా దాఖలు చేశారు. దీంతో బెయిల్ పిటిషన్ పై విచారణ సందర్భంగా హైకోర్టులో దాదాపు మూడున్నర గంటలపాటు వాదోపవాదనలు వినిపించాయి. అటు ఆమె తరఫున వాదించిన ప్రముఖ న్యాయవాది జెఠ్మలానీ ఆరోగ్య పరిస్థితిని దృష్టిలో వుంచుకుని బెయిల్ ఇవ్వాల్సిందిగా కోరారు. తర్వాత వాదనలు వినిపించిన ప్రాసిక్యూషన్ న్యాయవాది షరతులతో కూడిన బెయిల్ ఇస్తే తమకు ఎటువంటి అభ్యంతరం లేదని కోర్టుకు తెలిపారు.

దీంతో బెయిల్ వచ్చేస్తుందని అందరూ భావించారు. ఇంకా బెయిల్ రాకముందే ఆమె అభిమానులు ముఖ్యంగా అన్నాడీఎంకే అనుచరులు స్వీట్లు పంచుకుంటూ సంబరాలు మొదలుపెట్టేశారు. కొద్దిసేపటివరకు అందరూ సంతోషంలో మునిగితేలారు. కానీ అంతలోపే వెలువడ్డ కోర్టు తీర్పు అందరికీ షాకిచ్చేసింది. జయలలితకు బెయిల్ మంజూరు చేయడం లేదంటూ హైకోర్టు ఆమె దాఖలు చేసిన బెయిల్ పిటీషన్ ను తిరస్కరించేసింది. ఈ వార్తను టీవీ ద్వారా తెలుసుకున్న జయలలిత ఒక్కసారిగా కుప్పకూలిపోయారు. ప్రస్తుతం వైద్యపరీక్షలు చేయించుకుంటున్న ఆమె.. సుప్రీంకోర్టును ఆశ్రయించనున్నారు. ఆమె తరఫున న్యాయవాదులు బుధవారం సుప్రీంకోర్టులో బెయిల్ పిటీషన్ దాఖలు చేయనున్నట్టుగా వార్తలు వస్తున్నాయి. మరి సుప్రీమైనా ఆమెను దయదలిచి బెయిల్ మంజూరు చేస్తుందో, లేదో తెలుసుకోవాలంటే.. మరికొన్నిరోజులవరకు ఆగాల్సిందే!