ఢిల్లీలో పట్టపగలే ఎమ్మెల్యేపై కాల్పులు

Posted: 09/03/2014 10:03 AM IST

దేశ రాజధాని హస్తినలో పట్టపగలే దుండగులు తెగబడ్డారు. కట్టుదిట్టమైన భద్రత ఉండే ఢిల్లీలో ఓ ఎమ్మెల్యేపై కాల్పులు జరిపారు. ఎమ్మెల్యే, జమ్మూ కాశ్మీర్ బీజేపి నేత జితేందర్ సింగ్ పై దుండగులు కాల్పులకు పాల్పడ్డారు. అతి సమీపం నుంచి జరిపిన ఈ కాల్పుల నుంచి ఎమ్మెల్యే తృటిలో తప్పించుకుని ప్రాణాలు కాపాడుకున్నారు. ఢిల్లీలోని వివేక విహార్ ప్రాంతంలో ఈ ఘటన జరిగింది. ఈ ఘటనతో ఒక్కసారిగి హస్తిన ఉలిక్కిపడింది

ఎమ్మెల్యే బయటకు రాగానే.., అదును కోసం ఎదురుచూస్తున్న దుండగులు కాల్పులు ప్రారంభించారు. అయితే గన్ మెన్లు చాకచక్యంగా వ్యవహరించటంతో పాటు, జితేందర్ సింగ్ అప్రమత్తం కావటంతో ప్రమాదం తప్పింది. విషయం తెలుసుకున్న పోలిసులు వెంటనే ప్రత్యేక బృందాలను రంగంలోకి దింపారు. వివేక్ విహార్, సమీప ప్రాంతాల్లో అనుమానితులను ప్రశ్నిస్తున్నారు. ఇది ఢిల్లీలో ఉన్న గ్యాంగుల పనా లేక వేరే ప్రాంతాల నుంచి వచ్చిన వారు చేశారా అనే కోణంలో దర్యాప్తు చేస్తున్నారు. ప్రధాని సహా దేశ ప్రముఖులంతా ఉండే ఢిల్లీలో భద్రత అత్యంత పకడ్బందిగా ఉంటుంది. అలాంటి చోట ఒక ఎమ్మెల్యేపైనే అతి దగ్గరి నుంచి కాల్పులు జరిపారు అంటే.. ఇక సామాన్యుల భద్రత ఏంటని సందేహాలు తలెత్తుతున్నాయి.

 

కార్తిక్