టిక్కెట్టు లేకుండా విమానంలో ప్రయాణించిన ఘనుడు!

Posted: 08/07/2014 06:17 PM IST

ఎయిర్ పోర్టులో ఫుల్లుగా భ్రదతా సిబ్బంది... ఎయిర్ పోర్టు ఎంట్రీ నుంచి విమానం ఎంట్రీ గేటు దాకా చెకింగ్ అధికారులు... టికెట్టు తీసుకున్న కౌంటర్ నుంచి విమానంలో ఎక్కేదాకా వ్యక్తి దగ్గర పాస్ పోర్టు - వీసా - గ్రీన్ కార్డ్ - టిక్కట్టు వంటి తదితర చెకింగ్ చేసే నిపుణులు... ఇంతేకాదు.. విమానం ప్రయాణానికి సిద్ధమవుతున్న సమయంలో అందులో ఏమైనా పొరపాట్లు వున్నాయా అని తనిఖీలు చేసే అధికారులు... ఇంతమంది వున్నా వారందరికీ కళ్లుగప్పి ఒక వ్యక్తి టిక్కెట్టు లేకుండా విమానంలో దర్జాగా కూర్చోని ప్రయాణం చేశాడు. దాదాపు 3000 కిలోమీటర్ల దాకా ఎవరికంటా పడకుండా జాగ్రత్తగా దాక్కున్నాడు.

రష్యాకు చెందిన ఒక జెట్ లైనర్ విమానంలో ఒక వ్యక్తి టిక్కెట్టు లేకుండా హాయిగా తన ప్రయాణాన్ని కొనసాగించాడు. కెమిరోవా నగరం నుంచి బయలుదేరిన ఈ విమానంలో అతను ఎవరికీ తెలియకుండా ఇంజన్ లో దాక్కున్నాడు. అక్కడి నుంచి బయలుదేరిన ఈ విమానం తిరిగి హుర్ ఘడాలో ల్యాండయ్యింది. ఇక అక్కడి నుంచి ప్రయాణానికి సిద్ధం చేయడానికి ముందు అధికారులు రొటీన్ చెకప్ చేశారు. ఈ సందర్భంలోనే వారికి ఇంజన్ లో ఎవరో ఒక వ్యక్తి వున్నాడని గమనించగలిగారు. వెంటనే అధికారులకు సమాచారం అందించారు.

ఇంజిన్ నుంచి బయటకు తీసిన అనంతరం అధికారులు అతడిని విచారించడం మొదలుపెట్టారు. విచారణ నేపథ్యంలో అతడు విమాన ఇంజిన్ లోకి ఎలా ప్రవేశించాడని అడగగా.. అతని మానసిక స్థితి సరిగ్గా లేకపోవడంతో సమాధానం ఇచ్చి పరిస్థితిలో లేడని అధికారులు తెలిపారు. దీంతో అతనిని ఆసుపత్రికి తరలించి వైద్యపరీక్షలు చేయించారు. ఆ వ్యక్తి ఎవరు..? ఎక్కడి నుంచి వచ్చాడు..? విమానంలో ఎంట్రీ ఎలా అయ్యాడు..? అధికారులు అంత నిర్లక్ష్యంగా ఎలా వ్యవహరించారు..? అనే కోణంలో దర్యాప్తు చేపట్టారు.