విభజన చట్టాన్ని తూ.చా తప్పకుండా పాటించాల్సిందే

Posted: 08/02/2014 03:02 PM IST

విభజన చట్టాన్ని తూ.చా తకొత్త వివాదాలు సృష్టించడం సరికాదని,పార్లమెంట్ ఆమోదించిన విభజన చట్టాన్ని తూ.చా తప్పకుండా పాటించాల్సిందే అని కేంద్ర మంత్రి వెంకయ్యనాయుడు స్పష్టం చేశారు. రాష్ట్రాలు విడిపోయినా మనమంతా తెలుగు వారమే అని ఆయన అన్నారు. ఇరు రాష్ట్రాల ముఖ్యమంత్రులు సమస్యలపై కూర్చుని పరిష్కరించుకుని అభివృద్ధిపై ఎక్కువ సమయం కేటాయించాలని సూచించారు.

ఉదయం ఇరు రాష్ట్రాల సీఎంలతో వెంకయ్య వేర్వేరుగా సమావేశమయ్యారు. అనంతరం మీడియాతో మాట్లాడుతూ దేశంలోని అన్ని రాష్ట్రాలు ఇండియన్ టీంలాగా కలిసి కృషి చేయాలనేదే ప్రధాన మంత్రి మోదీ నిర్ధేశమని, దానిని దృష్టిలో పెట్టుకుని రాజకీయాలతో నిమిత్తం లేకుండా అభివృద్ధి కోసం కలిసి పనిచేద్దామని ఇరు రాష్ట్రాల సీఎంలకు చెప్పినట్లు వెల్లడించారు.

కేంద్ర పథకాలు అమలు చేయాల్సిన బాధ్యత రాష్ట్రాలదే అన్న వెంకయ్య కేంద్రం, రాష్ట్రాలు సమన్వయంతో పనిచేయాలన్నారు. పట్టణ, గ్రామీణాభివృద్ధిపై చంద్రబాబు, కేసీఆర్‌కు నోట్ ఇచ్చానన్నారు.

ఇద్దరు సీఎంలతో సమావేశం అర్థవంతంగా జరిగిందన్నారు. రాష్ట్ర ప్రభుత్వ వ్యవహారాల్లో కేంద్రం జోక్యం చేసుకోదని ఆయన వెల్లడించారు. పరిపాలనను వికేంద్రీకరించాలని, పరిపాలనలో పారదర్శకత ముఖ్యమని సూచించారు.

జోన్లవారీగా ముఖ్యమంత్రులతో సమావేశం ఏర్పాటు చేయాలని కేసీఆర్ సూచించారని, అందుకు తాను సానుకూలంగా స్పందించినట్లు చెప్పారు. కేంద్రానికి తెలంగాణ ప్రభుత్వానికి మధ్య గ్యాప్‌లేదని వెంకయ్య తెలియజేశారు.