గవర్నర్ కి ఉమ్మడి పోలీసింగ్ అధికారాలు!

Posted: 07/25/2014 08:48 AM IST

తెలంగాణా ఆంధ్రప్రదేశ్ రాష్ట్రాలకు ఉమ్మడి రాజధానైన హైద్రాబాద్ లో ఉమ్మడిగానే శాంతి భద్రతల పర్యవేక్షణ జరగాలని కేంద్ర ప్రభుత్వం నిర్ణయం తీసుకుంటోందని తెలిసింది. 

ఉమ్మడి రాజధానిలో గవర్నర్ కి అధికారాలిస్తే మేం ఊరుకోం.  అగ్గి మంట పెడతామంటున్నారు సాక్షాత్తూ తెలంగాణా హోంమంత్రి నాయిని నర్సింహారెడ్డి.

రాష్ట్ర పునర్విభజన బిల్లు ప్రకారం హైద్రాబాద్ ఉమ్మడి రాజధాని కనుక అక్కడ శాంతి భద్రతల బాధ్యత కూడా ఉమ్మడిగానే జరగాలని సూచించటం జరిగింది.  అందుకు అనుగుణంగా గవర్నర్ అధ్యక్షతన ఇరు రాష్ట్రాల డిజిపిలు అందులో సభ్యులుగా శాంతి భద్రతలను పర్యవేక్షించాలని బిల్లులో ఉంది.  అందుకు గవర్నర్ కి ఇద్దరు సలహాదారులను కూడా కేంద్ర ప్రభుత్వం నియమించటం జరిగింది.  

కానీ తెలంగాణా ప్రభుత్వం ఈ ప్రతిపాదనను మొదటి నుంచి వ్యతిరేకిస్తూ వస్తోంది.  హైద్రాబాద్ మా రాష్ట్రంలోదే, మా రాష్ట్రాన్ని ఎలా నడిపించాలో మాకు తెలుసు అంటోంది తెలంగాణా ప్రభుత్వం.  

ఈ విషయంలో తన వ్యతిరేకతను తీవ్రమైన పదజాలంతో తెలియజేసిన తెలంగాణా హోం మంత్రి నాయిని నర్సింహారెడ్డి, అదే గనక జరిగేత అగ్గి మంట పెడతాం అని తెలంగాణా భవన్ లో అన్నారు.  ఆ సమయంలో ఇతర పార్టీలకు చెందిన పలువురు నేతలు తెలంగాణా రాష్ట్ర సమితిలో చేరారు.  

-శ్రీజ