ఆడలేక మద్దెలఓడు అన్నట్లుంది ఏపీమంత్రుల తీరు!

Posted: 07/19/2014 04:52 PM IST

Nayini narasimha reddy comments on fees reimbursement

విద్యార్థుల ఫీజు రీయింబర్స్ మెంట్ మీద ఇంకా రచ్చ కొనసాగుతూనే వుంది. అటు ఏపీ మంత్రులు తెలంగాణాలో వున్న ఆంధ్ర విద్యార్థులకు ఫీజు రీయింబర్స్ మెంట్ పథకాన్ని అమలు జరిగేలా చేయాలని డిమాండ్ చేస్తుంటే... ఇటు తెలంగాణ మంత్రులు మాత్రం ఇందుకు ససెమిరా అంటున్నారు. 1956వ సంవత్సరానికి ముందు తెలంగాణాలో వున్నవారిని మాత్రమే స్థానికంగా పేర్కొంటూ... వారికే ఫీజు రీయింబర్స్ మెంట్ అమలు జరిగేలా చూస్తామని, అలాకాని విద్యార్థులకు ఆ పథకం అమలు కాదని తెలంగాణ ప్రభుత్వం ప్రకటించిన విషయం తెలిసిందే!

ఇప్పుడు తాజాగా ఈ విషయం మీద తెలంగాణా హోమ్ మినిస్టర్ అయిన నాయిని నరసింహారెడ్డి కొన్ని ఘాటు విమర్శలు చేశారు. ‘‘ఆడలేక మద్దెల ఓడు అన్నట్లు ఆంధ్ర మంత్రులు వ్యవహరిస్తున్నారు’’ అని ఆయన తీవ్రంగా విమర్శించారు. తెలంగాణ విద్యార్థులకే మేము ఫీజు కట్టుకుంటామంటే.. దాని ఏపీ మంత్రులు అడ్డుపడుతున్నారని, అసలు అడ్డుపడటానికి వారెవరంటూ ఆయన మండిపడ్డారు. తెలంగాణ విద్యార్థుల భవిష్యత్తు మామీదే వుంది. వారికి ఫీజు రీయింబర్స్ మెంట్ కట్టే బాధ్యత మాదే! దానికి అడ్డుపడటానికి ఆంధ్రమంత్రులు ఎవరు..? అంటూ ఆయన వ్యాఖ్యానించారు.

‘‘ప్రపంచంలోనే అద్భుతమైన రాజధానిని నిర్మించుకుంటామని వాగ్ధానాలు చేస్తున్న ఆంధ్రమంత్రులు... తమ విద్యార్థుల కోసం కనీసం ఫీజు కూడా కట్టుకోలేరా’’ అని నాయిని ప్రశ్నించారు. ‘‘తెలంగాణాలో వున్న ఏపీ విద్యార్థుల ఫీజును ఆ ప్రభుత్వమే కట్టాలి. ఇది వారి బాధ్యత!’’ అంటూ ఆయన స్పష్టం చేశారు. తెలంగాణ రాష్ట్రంకోసం ఎన్నో ఉద్యమాలు చేసుకుంటూ రాజకీయ స్థాయికి ఎదిగామని, ఇప్పుడు మా రాష్ట్రంలో మాకు నచ్చినవిధంగా అధికారాన్ని నడుపుకుంటామని ఆయన వెల్లడించారు.

అలాగే కొంతమంది ఆంధ్రమంత్రులు కేసీఆర్ ని దూషిస్తూ నోటికొచ్చినట్టు వాగుతున్నారని.... వారు తమ నోరును ఎంత అదుపులో వుంచుకుంటే అంతే మంచిదని హెచ్చరించారు. ఎన్నో ఉద్యమాలు చేసి రాష్ట్రాన్ని ఏర్పాటు చేసుకున్న మా తెలంగాణాలో... ఇతర పార్టీలవారికి అధికారం చెలాయించే హక్కు లేదని... ఇకనుంచైనా ఆంధ్రమంత్రులు తమను తాము అదుపులో వుంచుకుని, ప్రజల క్షేమం కోసం పాటుపడాలని ఆయన హేతువు పలికారు.