ముఖ్యమంత్రి పదవి ముళ్ళకిరీటం- బాబు

Posted: 06/16/2014 06:37 PM IST

ఎన్నికలలో అఖండ విజయం సాధించి, ఆంధ్రప్రదేశ్ ముఖ్యమంత్రిగా పదవీ స్వీకారం చేసిన తర్వాత మొదటిసారి తన సొంత నియోజకవర్గం రామకుప్పంలో ఈరోజు పర్యటించిన చంద్రబాబు నాయుడు అక్కడ బహిరంగ సభలో మాట్లాడుతూ ముఖ్యమంత్రి పదవి ముళ్ళకిరీటమేనని అన్నారు.  

రాష్ట్రం ప్రస్తుతమున్న పరిస్థితుల్లో అది నిజమే.  కానీ తాను కష్టపడటానికి తయారేనని, కష్టపడటం తనకి కొత్తకాదని అన్నారు చంద్రబాబు.  విభజన తర్వాత ప్రస్తుత ఆర్థిక స్థితి పూర్తిగా పడిపోయిన పరిస్థితుల్లో ఉద్యోగుల జీతలివ్వటానికే రాష్ట్ర ఖజానాలో డబ్బు లేదని, ఆర్థిక వనరులు లేనందున కష్టపడి సంపాదించాల్సిన అవసరం ఉందని, అభివృద్ధి కార్యక్రమాల ద్వారా అది సాధ్యమని అన్నారు.  రాష్ట్రాభివృద్ధికి ప్రణాళికలను సిద్ధం చేస్తున్నామని కూడా ఆయన అన్నారు.

ఈ సంక్షోభాన్ని సవాల్ గా తీసుకుని ముందుకెళ్దామని, అందుకు అందరు సహకరించాలని, అందరి ఆశీర్వాదాలు కావాలని చంద్రబాబు అన్నారు.

కేంద్ర ప్రభుత్వంలో భాగస్వాములం కాబట్టి నిధులు వచ్చే అవకాశం ఉందని భరోసా కూడా ఇచ్చిన చంద్రబాబు రైతుల ఋణమాఫీలతో సహా అన్ని హామీలను నెరవేరుస్తానని సభాముఖంగా మాటిచ్చారు.

-శ్రీజ