కేసీఆర్‌ పచ్చి అబద్ధాలకోరు - షబ్బీర్‌అలీ

Posted: 11/13/2015 03:26 PM IST

తెలంగాణ రాష్ట్ర ముఖ్యమంత్రి కేసీఆర్ మీద విమర్శలు మరింత పెరుగుతున్నాయి. తొలుత రాష్ట్రాభివృద్ధిలో ఎన్నోరకాల ప్రణాళికలు చేపడుతున్న ఆయన.. వాటిని ఆచరణలోకి తీసుకునిరావడంలో చాలా ఆలస్యం చేస్తున్నారంటూ ప్రజలు ఆగ్రహం వ్యక్తం చేయడంతోపాటు విపక్ష పార్టీలు తీవ్రస్థాయిలో మండిపడుతున్నాయి. ఈ నేపథ్యంలో ఈయనపై చాలామంది నేతలు తమ నోటికొచ్చినట్లు కొత్తకొత్త పదాలతో తిట్లు తిట్టేస్తున్నారు. తన మాయమాటలతో కేసీఆర్ ప్రజల్ని మభ్యపెట్టి.. రాష్ట్రాభివృద్ధి కాకుండా తన కుటుంబాన్ని పోషించుకుంటున్నారంటూ ఆరోపణలు చేస్తున్నారు. ఆయన వల్ల రాష్ట్ర పరిస్థితి మరింత దిగజారిపోయిందంటూ అభిప్రాయాలు వెల్లడిస్తున్నారు. ఈ తరహాలోనే తాజాగా మాజీమంత్రి షబ్బీర్ అలీ ఆయనపై తీవ్ర విమర్శలు గుప్పించారు.

ప్రస్తుతం వరంగల్ ప్రచారంలో ఫుల్ బిజీగా వున్న షబ్బీర్ అలీ.. ఈ సందర్భంగా కేసీఆర్, ఆయన కుటుంబం మీద మండిపడ్డారు. కేసీఆర్‌ పచ్చి అబద్ధాలకోరని ఆయన విమర్శించారు. ఇటీవల కేసీఆర్‌పై జరిగిన సీబీఐ విచారణ వివరాలను బయటపెట్టాలని ఆయన కోరారు. కేసీఆర్‌ కుటుంబ పాలనపై ప్రజలు తిరుగుబాటు చేస్తారని ఆయన వ్యాఖ్యానించారు. ప్రజల సంక్షేమాన్ని మరిచి, స్వంత స్వలాభాల చూసుకుంటున్నారని, ఇలాగే కొనసాగితే ప్రజలు ఏదో ఒకరోజు కేసీఆర్ కుటుంబంపై వ్యతిరేక పోరాటం కచ్చితంగా చేస్తారని పేర్కొన్నారు. తెలంగాణ కోసం కేటీఆర్‌, కవితలకంటే మావోయిస్టు శృతి ఎక్కువగా పోరాడారని, కాని ఆమెను అన్యాయంగా, అత్యంత దారుణంగా హత్యచేశారని షబ్బీర్‌అలీ ఆరోపించారు. కేసీఆర్ మాటల్ని నమ్మొద్దంటూ ప్రజలను హెచ్చరించారు.

AS